№12 мектептің жаңа оқу жылына дайындығы

Редакциямызға №12 мектептің ата-аналары қоңырау шалып, мектептің жаңа оқу жылына дайын еместігі туралы шағымданған болатын. Шынымен де біз барғанда жөндеу жұмысын бітіруге және құрылыс материалдарының қалдығын жинауға асыққан гастарбайтерлерді кезіктірдік.  

Алайда, мектеп директоры Ербол ҚАШАУБАЙДЫҢ айтуынша, мектепте «бәрі жақсы, мектеп жаңа оқу жылына 100 пайыз дайын». Кейбір сұрақтарға ол сенімді түрде былай деп жауап берді:

- Кітап мәселесі шешілді ме?

- 99 пайыз шешілді. Өз оқушыларымызды түгел қамтып, қазір кітаптарды таратудамыз.

- Ұстаздар мектептен жаппай жұмыстан шығуда деген ақпар түсті. Бұл қаншалықты рас?

- Бұл - толық жалған. Осы оқу жылына жаңадан 3 мұғалім алдық. 98 педагог жұмыс атқаруда. Мұғалімдер жеткілікті.

- Оқушылар қауіпсіздігі қаншалықты қамтамасыз етілген?

- Бейнебақылаудың 24-ін орнаттық. 23-і жұмыс істеп тұр.

- Ұстаздар сіздің қызметіңізге көңілі толмай шағым түсірген. Бұл қаншалықты рас?

- Мен осы мектепке 2 жыл бұрын келіп, білім берудегі «багажыммен» келдім. Өзіме ондай арыздар түскен жоқ. Барлығына бірдей жағу мүмкін емес.

Бұл мектептегі кадрлар мәселесіне қатысты сұраққа облыстық білім беру басқармасының басшысы Нұрсәуле САЙЛАУОВА  жауап берді. Оның айтуынша, №12 мектептің 9 мұғалімі Нұрсая ықшам ауданында тұратындықтан сонда ашылған жаңа мектепке ауысқан.

Фархат ӘБІЛОВ

Суреттерді түсірген автор