Түркия мен Еуроодақтың қарым-қатынасы қиындап тұр

Еурокомиссияның Президенті Жан-Клод Юнкер Түркия мен Еуроодақтың қарым-қатынасы қиындап тұрғанын мәлімдеді. 

  "Түркия Еуроодақтан алыстап барады. Менің ойымша, Ердоған Түркияның Еуроодаққа кіру туралы келісімдеріне біздің тараптан нүкте қойылғанын қалайтын сияқты. Сонда ол екіжақты қарым-қатынастардың шиеленісуіне Еуроодақты кінәлап, өзінің айыбын жасырып қалушы еді", - деді ол. 

Еуроодақ Түркияда өткен жылы орын алған мемлекеттік төңкеріс жасауға талпыныс оқиғасынан кейін Режеп Тайып Ердоғанның күдікті азаматтарды жаппай қудалауға ұшыратқанына қатысты наразылық білдірген болатын. Германия канцлері Ангела Меркель: "Германияда 3 млн түрік азаматтарының тұратынын ескеріп, Түркия билігі өз елінде конституциялық құқықтарды сақтауы керек. Олар адам құқықтары мен бостандықтарын еркін бұзып отырғандықтан, біздің қарым-қатынастарымызға сызат түсіп отыр", - деді. 

Ақпан айында Түркияда неміс-түрік журналисті Дениз Юкель тұтқындалған кезде, Германия Үкіметі биліктің тек өз елінде ғана емес, шет елде де сөз бостандығын шектеп отырғанын айтып, әлем назарын аударып еді. 

Дереккөз: qazaqtimes.com