Біздің әртістер алғашқы екі орынды иеленді

Астанада  13-тен 29 жасқа дейінгі мүмкіндіктері шектеулі жастар арасында І республикалық фестиваль өтті.

Байқау бес шығармашылық және спорттық номинациялар бойынша өтті. Оларға алты облыстан 100 шақты байқауға қатысушылар қатысты. Біздің өңірімізден «Өмір гүлі» мүгедектер ансамблі өнер көрсетті.

- Вокалдық байқауда Александр Серовтың репертуарындағы «Я люблю тебя до слез» әнін әсерлене орындаған Махамбет ауданынан келген 29 жастағы Ерлан ЖҰМАБАЕВТЫҢ бірінші орын алғаны қуантады, - дейді ансамблінің көркемдік жетекшісі Тыныш ЖАҚЫПОВА. – Вокал бойынша екінші орынды 15 жастағы әнші Ақерке БОРАН иеленді. «Аспаптық орындау» номинациясында біздің «Ёнг старс» ансамблі жеңімпаз атанды. Оған қоса, боулингте ансамблдің бас-гитарашысы Ринат Сиражев екінші орын алды. Топ құрамына Р.Сиражев, Эрнест Бахтияров (ритм-гитара), Бекзада Асқарова (пернелі аспап), Айзада Асқарова (соғымпаз), солистер - Ақбаян Бірән, Дәулет Есқабыл және Рита Рушан кіреді. Жүлделі орын алған байқауға қатысушылар «MEGA SilkWay» сауда-ойын сауық орталығында өткен гала-концертке қатысты. Ол жерде байқауға қатысушыларды қазақстандық эстрада жұлдыздары мен Астана қалалық мәслихатының депутаттары құттықтап, сыйлықтар табыс етті. Бұл жерде ансамблдің орындауында Шәмшінің «Арыстың жағасында» әні шырқалды.

Мұрат СҰЛТАНҒАЛИЕВ