Ақ үй: АҚШ энергетикалық саясатының "алтын дәуірі" туып келе жатыр

2 046 просмотра

АҚШ президенті Дональд Трамп АҚШ-тың энергетикалық саясатының "алтын дәуірін" бастайтын шаралар қабылдайтынын жариялады. Трамп елде енді ядролық энергетика саласы жаңарып, америкалық қуат көздерін экспорттауға қойылған шектеулер әлсірейтінін мәлімдеді.

Энергетика министрлігінде сөйлеген Дональд Трамп АҚШ бүкіл әлемге қуат көздерін сататынын және осы арқылы әлемдік масштабтағы "қуатын күшейтетінін" айтты. Сығымдалған газ Азия нарықтарына, көмір Украинаға экспортталып, шетелдің көмір жобаларын несиелендіруге салынған шектеулер жойылмақ.

Трамп әкімшілігі АҚШ-тың ішкі энергетика саласын дамытуда атом электр станцияларының (АЭС) тиімділігін арттыруға талпынбақ. АҚШ-та АЭС-те өндірілетін электр қуаты елде өндірілетін жалпы электр қуатының 20 пайызын құрайды.

Дональд Трамптың дәстүрлі қуат көздерін белсенді дамытуға мүдделілік танытуы "климатты сақтауды" қорғаушылардың алаңдаушылығын тудырып отыр. АҚШ президенті 1 маусымда Вашингтонның климат жөніндегі Париж келісімінен шығатынын жариялаған. Шілденің басында өтетін "Үлкен жиырмалық" елдерінің саммитінде басты назар ғаламдық жылыну мәселесіне арналады деген болжам бар.

Дереккөз: Азаттық

30 маусым 2017, 10:29

Телеграм арнасына жаңалық жіберу

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы тақырыпқа қатысты бөлісетін жаңалық болса, бізге хабарласыңыз. Ақпарат пен видеоны Телеграм арнамызға және editor@azh.kz жіберіңіз.