Әлемдегі бірінші робот-полицей өз қызметіне кірісті

24 мамырда әлемдегі ең бірінші робот-полицей өз қызметіне кіріседі, - деп хабарлайды CNN.  

REEM есімді құлтемірді испаниялық PAL Robotics компаниясы құрастырған. Оның бойы - 1,67 метр, басы, екі қолы және кеудесінде сенсор экраны бар. Робот-полицей дөңгелек арқылы қозғалады. Андроид тоғыз тілде сөйлесе алады және 80 пайызға адамның бет-әлпетін ажырата алады. Ол туристік жерлерде және сауда орталықтарында патрульдік қызмет атқарады, сұрақтарға жауап беріп, мәлімет беріп, айыппұлдарды қабылдай алады. Темір күзетші қол алысып, әскери сәлемдесе алады. 

Сонымен қатар, оған қылмыс туралы айтуға болады, бірақ онымен тірі адамдар айналысатын болады. Дубайда 2030 жылға дейін жергілікті полицейлердің төрттен бір бөлігін роботтармен қамтамасыз етуді жоспарлап отыр. Сол кезде тек роботтар қызмет көрсететін полиция бөлімшесі ашылады екен.

Дереккөз: Тengrinews.kz