Санкт-Петербургке қарасты Васильев аралында жарылыс болды

Санкт-Петербургте тағы да жарылыс. «Васильевский аралы» ауданындағы оқыс жағдайдан бір адам жараланды. Соңғы мәліметтерге қарағанда белгісіз зат Санкт-Петербург технологиялық университеті студентінің қолында жарылған. 

Қазір ол ауруханада жан сақтау бөлімінде жатыр. Дәрігерлердің хабарлауынша, өміріне еш қауіп төніп тұрған жоқ. Жарылыс болған кітапхана аумағы қоршауға алынып, тексеру жұмыстары жүріп жатыр. 

Айта кеткен жөн, 3 сәуірде Санкт-Петербургте «Сенная площадь» және «Технологический институт» метро станциялары арасындағы туннельде жарылыс болған еді. Салдарынан 15 адам ажал құшқан. 

Сергей Смирнов, куәгер: 

- Қатты дауыс естідім. Сыртқа шықсам, бір топ адам жиылып қалыпты. Жерде жатқан жігіттің өн бойын қан жуып кеткен. Тіпті жарылғыш саусақтарын жұлып әкеткен.

Дереккөз: 24 Хабар