Ресей Сирияның әуе шабуылынан қорғаныс жүйесін күшейтпек

2 825 просмотра

Ресей қорғаныс министрлігі АҚШ-тың Сирияның Шайрат әуе базасына зымыранмен соққы жасағанынан соң Сирияда әуе шабуылынан қорғаныс жүйесі күшейтілетінін мәлімдеді. Министрлік өкілі Жерорта теңізіндегі америкалық әскери кемелерден атылған 59 зымыранның 23-і ғана Сирия үкіметінің әуе базасына жеткенін айтты.

Ресей президенті Владимир Путин АҚШ-тың Сирияға зымыранмен соққы жасауына байланысты қауіпсіздік кеңесінің жиынын өткізеді. Кремльдің баспасөз хатшысы Дмитрий Песковтің сөзіне қарағанда, Мәскеуге америкалық әскери-теңіз күштерінің зымыран соққысын жасауға дайындалып жатқаны туралы ескертілген.

АҚШ-тың 7 сәуірде Хомс провинциясындағы Шайрат әуе базасына соққы жасауынан жеті адам қаза тауып, жеті адам жараланған. Соққы Сирияда химиялық қару қолданылғанына жауап ретінде жасалған.

АҚШ-тың Сирияға соққы жасауын Германия, Франция және Ұлыбритания басшылары қолдады. Сирия оппозициясы да америкалық әскерилердің әрекетін құптады. Кремль бұған дейін АҚШ-тың шабуылын егеменді мемлекетке басқыншылық жасау деп атаған. Ресей Сириядағы операциялар барысында осы ел аумағында ұшақтардың ұшу қауіпсіздігін қамтамасыз ету туралы АҚШ-пен жасасқан келісімінің күшін тоқтатты.

Ресей 2015 жылы қарашада Сирияның Латакия провинциясындағы Хмеймим әуе базасына С-400 зымыраннан қорғаныс кешендерін жеткізген.

Дереккөз: Азаттық

7 сәуір 2017, 16:59

Телеграм арнасына жаңалық жіберу

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы тақырыпқа қатысты бөлісетін жаңалық болса, бізге хабарласыңыз. Ақпарат пен видеоны Телеграм арнамызға және editor@azh.kz жіберіңіз.