Путин мен Трамп телефонмен сөйлесті

2 710 просмотра

АҚШ-тың жаңа сайланған президенті Дональд Трамп Ресей президенті Владимир Путинмен телефонмен сөйлесіп, екі ел арасындағы күрделі қарым-қатынасты талқылады. Трамп өкілдері таратқан мәлімдемеде Путиннің оны президент болып сайлануымен құттықтағаны айтылады. Мәлімдемеде Трамп "Ресеймен берік және ұзақ мерзімді байланыс орнатудың мүмкіндіктерін тағатсыздана күтіп отыр" делінген. Трамп пен Путин "АҚШ пен Ресей алдында тұрған бірқатар проблеманы, стратегиялық экономикалық мәселелерді" талқылаған,- деп хабарлады Азаттық.

Бұған дейін Кремль Путин де, Трамп та екі ел арасындағы қарым-қатынастың қазіргі жай-күйін "мүлдем қанағаттанарлықтай емес" деп білетінін хабарлаған. Ресей президенті Трампқа "өзара құрмет пен елдің ішкі ісіне араласпаған түрде" диалог орнатуға дайын екенін айтқан. Кремль бұған қоса тараптар "екі жақты қарым-қатынасты өнімді ынтымақтастыққа қарай бағыттауға" уағдаласты дейді.

Ресей мен АҚШ арасындағы қарым-қатынас Ресей 2014 жылы Украинадан Қырым түбегін заңсыз аннексиялап алып, Мәскеу Украина шығысындағы сепаратистерге және Сирия президенті Башар Асадқа қолдау көрсете бастаған соң күрт нашарлаған.

Дереккөз: Аzattyq.org

15 қараша 2016, 10:13

Телеграм арнасына жаңалық жіберу

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы тақырыпқа қатысты бөлісетін жаңалық болса, бізге хабарласыңыз. Ақпарат пен видеоны Телеграм арнамызға және editor@azh.kz жіберіңіз.