​Миялыдағы тәрбиешіге қатысты үкім шықты

Қызылқоға аудандық соты балабақша тәрбиешісіне қатысты үкім шығарды.

Еске салсақ, осы жылдың 20 маусымында Миялы ауылындағы «Балдәурен» балабақшасында соңы өлімге әкеп соқтырған қайғылы жағдай орын алған болатын. Үш жасар сәби екі қабатты балабақша ғимаратының ішкі жағындағы баспалдақтан құлап, басынан қатты жарақат алып, көз жұмған.

Осы факт бойынша тәрбиешінің үстінен ҚР ҚК-нің 141-баптың 2-тармағымен («Балалардың өмiрi мен денсаулығының қауiпсiздiгiн қамтамасыз ету жөнiндегi мiндеттердi тиісінше орындамау»)

қылмыстық іс қозғалды.

- Аудандық сот тәрбешіні айыпты деп танып, бір жылға бас бостандығын шектеуге үкім шығарды, - дейді Қызылқоға ауданы прокурорының орынбасары Серік ЖАҢАБАЕВ.

Үкім әлі заңды күшіне енген жоқ.

Ләззат ҚАРАЖАНОВА