Ислам Каримовтің дүние салғаны ресми хабарланды

Өзбекстанның мемлекеттік телеарнасы президент Ислам Каримовтің 2 қыркүйек күні сағат 20.15-те Ташкентте қайтыс болғанын хабарлады. Солайша оның денсаулығына қатысты бір аптаға жуық созылған алып-қашпа әңгімелерге тоқтау салатын ресми мәлімдеме жарияланды,- деп хабарлады Азаттық.

Ислам Каримов 3 қыркүйек күні туған қаласы Самарқанда жерленбек.

Мемлекеттік жерлеу комиссиясын премьер-министр Шавкат Мирзияев басқарады.

78 жасында миына қан құйылып дүние салған бұрынғы коммунист Өзбекстанда 27 жыл билік құрды. Каримовтің кезінде саяси диссиденттер мен азаматтық белсенділерді арнайы қауіпсіздік және барлау органдары аяусыз қудалап, жаныштаумен болды.

Дереккөз: Аzattyq.org