Сириялықтар ителгі аулап ұсталды

23 тамызда Жылыой АІІБ қызметкерлері Құлсары қаласынан 70 шақырымдай жерде күдік тудырған «Митцубиси Паджеро» маркалы екі автокөлікті тоқтатты. Тексеру барысында автокөліктен 12 калибрлі аң аулайтын мылтық пен 21 дана оқ-дәрі, 25 тірі көгершін құсы табылды.

Автокөілк ішінде Құлсары және Ақтау қаласының екі тұрғыны мен Сирия Араб Республикасының жеті азаматы болған. Сириялықтар полицияға Қазақстанға ителгі аулауға келгенін, ал, көгершінді соны аулауға пайдаланғанын түсіндірген.

Айта кету керек, ителгі аулау – араб шейхтарының сүйікті істерінің бірі.

Жылыой аудандық ІІБ бастығы Иса БЕКҚАЛИЕВТІҢ хабарлауынша, осы факт бойынша ҚР ҚК 337-бабының 1-тармағы («Заңсыз аң аулау») бойынша соталды тергеу амалдары жүріп жатыр. Сондай-ақ, шетел азаматтарының ҚР-сы аумағында жүру заңдылығын тексеру жүргізілуде.