Британияда жарты ғасыр ішіндегі ең ұзақ ереуіл өтіп жатыр

Ұлыбританияда «Саузерн Рэйлуэй» теміржол компаниясының қызметкерлері бескүндік ереуіл өткізіп жатыр. Бұл соңғы жарты ғасыр ішіндегі ең ұзақ наразылық шарасы болғалы тұр,- деп хабарлады BNews.kz.

Салдарынан мекемеге тиесілі пойыздардың 40 пайызы қызметін уақытша тоқтатты. Оған компания басшылығының жолсеріктерді қысқарту туралы шешімі түрткі болған. Есесіне автоматты түрде жұмыс істейтін пойыздарды рет-ретімен іске қосу жоспарланып отыр.

Ереуілшілердің айтуынша, бұл жағдайда бар ауыртпалық машиниске жүктеледі. Өйткені пойыз есігі соның кабинасынан ашып-жабылады. Оның үстіне жаңа шешім көліктегі қауіпсіздік деңгейін төмендетеді деген пікір де айтылып қалып жатыр. Енді соңғы өзгерістердің күшімен 300-ге жуық адам жұмыссыз қалуы мүмкін.

«Соңғы уақытта «Саузерн Рэйлуэй» компаниясындағы жағдай түсініксіз болып тұр. Сапарларды кейінге шегеру жиілеп кетті. Меніңше, олар көрсетілген қызмет сапасына қарай билеттердің бағасын арзандатуы керек. Өйткені адам көп. Діттеген жерімізге жете алмай, әлекке түсіп жатамыз», - дейді жолаушылардың бірі.

«Компания басшылығы бұл мәселені шешуі тиіс. Олар уақытымыздың босқа кетіп жатқанын ойламайды. Оның үстіне мұның ел экономикасына да кері әсері тиіп жатқаны анық», - дейді тағы бір британиялық жолаушы.

Дереккөз: BNews.kz