​Құрманғазыдағы бассыздық

Құрманғазы аудандық прокуратурасы тексеру барысында аудандық орталық ауруханасында психиатриялық есепте тұрған сырқат жандарға мұндай есепте жоқ деген жалған анықтамалар бергендігі және олардың кейін осы анықтамамен жүргізуші куәлігін алғандығы анықталды.

- Жүргізуші көлігінің берілу заңдылығын тексеру кезінде көлік құралын басқаруға абсолютті тыйым салынған психиканың органикалық бұзылулары, шизофрения, шизотипті және сандырақтық бұзылулар, кемел шақта тұлғалық пен мінез-құлықтың бұзылуы, ақыл-ой кемдігі сияқты медициналық қарсы көрсетілімдері бар аурулармен ауыратын 23 адамға жүргізуші куәлігі берілгендігі анықталды, - дейді Құрманғазы ауданының прокуроры Ерлан ХИСМИТУЛЛИН. - Олардың 15-і психиатриялық есепке алынғаннан кейін куәлікті алса, ал 8-і жүргізуші куәлігін алғаннан кейін есепке алынған.

Мәселен, биыл 2014 жылдан бері ақыл-ой кемістігімен психиатриялық есепте тұрған Дәшін ауылының 28 жастағы тұрғыны жалған анықтамамен жүргізуші куәлігін алған.

Аудандық прокуратура ҚР ҚК-нің 385-бабының 3-тармағымен («Көрiнеу жалған құжатты пайдалану») қылмыстық қозғады, сотқа дейінгі тергеп-тексеру шаралары жүріп жатыр.

Ләззат ҚАРАЖАНОВА