Әлиев пен Саргсян Санкт-Петербургте кездесті

Фото: Аzattyq.org Әзербайжан президенті Ильхам Әлиев пен Армения президенті Серж Саргсян Санкт-Петербургте кездесіп, Әзербайжаннан бөлінген Таулы Қарабақ аймағына қатысты жанжалды реттеуді талқылады,- деп хабарлады Азаттық. Келіссөзге Ресей президенті Владимир Путин де қатысты. Екі ел басшылары биыл сәуірдің басында Таулы Қарабақта болған бірнеше күндік қақтығыстан соң екінші рет кездесіп отыр.

Ресей сыртқы істер министрі Сергей Лавровтың сөзінше, үш ел президенттері бірлескен мәлімдемесінде Таулы Қарабақтағы өзара шектесетін аймақта жағдайды қалыпқа келтіруге дайын екенін білдіріп, Еуропадағы қауіпсіздік және ынтымақтастық ұйымы (ЕҚЫҰ) бақылаушыларының санын арттыруға келіскен. Әлиев пен Саргсян бұған дейін мамыр айында Венада кездескен.

Таулы Қарабақтағы Армения қолдайтын сепаратистер 1990 жылдардың басында болған соғыста Әзербайжаннан бөлініп кеткен. Ол соғыста 30 мыңға тарта адам қаза болған. Қақтығысты тоқтату туралы әлсіз келісімдерге қарамастан, жанжалды бейбіт шешу жөніндегі дипломатиялық қадамдар айтарлықтай нәтижелер берген жоқ.

Дереккөз: Аzattyq.org