«Маржан қыз» көз жұмды

Индер ауданы Елтай ауылында өткен ғасырдың 50-ші жылдары жазылып, талай той дастархандарында және ән кештерінде шырқалған танымал «Маржан қыз» әнінің кейіпкері Маржан ЕНБАЕВА 91 жасында дүниеден озды. Жерлеу рәсімі 9 маусым күні өтті.

Маржан Енбаева 1924 жылы Индер ауданы Есбол селосында дүниеге келді. Зейнеткерлік жасқа дейін жылқы бақты. Оның бағымына 1942-1946 жылдар аралығында 237 құлын сеніп тапсырылған болатын. Оған 1948 жылы Социалистік Еңбек Ері атағы берілді. Ол кезде оның жасы 24-те еді.

Ол бізге үш жыл бұрын берген сұхбатында өткен күндерін былай деп еске алып еді: «Қарамағымызда 300-ге жуық жылқы болды. Ол кемімейді, не көбеймейді. Он күнде бір келіп, жылқыларды іріктеп, Атырау арқылы вагондап соғысқа жібереді де, орнына басқа арық-тұрағын әкеледі».

Енбаеваның ерлігі елді елең еткізбей қоймады. Белгілі сатирик ақын Садықбек АДАМБЕКОВ «Маржан қыз» өлеңін жазып, оған танымал композитор Әбілахат ЕСПАЕВ ән жазды.

Ләззат ҚАРАЖАНОВА