Заңгер Темірбанк қызметкерлері айла-шарғы жасады деп отыр

Азаматтық қоғам өкілдері Темірбанкті айла-шарғы жасады деп айыптады, - деп хабарлайды Tengrinews.kz тілшісі. Адвокат Айман Омарованың айтуынша, банк қызметкерлері 2006-2007 жылдары Ресейден келген сығанға несие берген. Ол автокөлік сатып алып, оны басқа біреуге қайта сатқан да, хабар-ошарсыз кеткен.

"Жалпы алғанда, 500-ге жуық адам мүліктің заңсыз тәркіленгенін айтып, сотқа шағымданды. Екі жағдайды баяндайын - менің қорғауымдағы Ольга Логвинованың күйеуі қазір тұтқынға алынды, тергеу жалғасып жатыр. Ол машина сатып алған, көлік кепілге қойылған болып шықты. Кейін біз банктен 2007 жылы Ресейден келген Януш Михай есімді сығанның несие алғанын анықтадық. Ол біраз уақыт тобырда өмір сүрген, оқу-жазуды білмейді. Банктің оған несиені қалай бергені таңғалдырады. Біз банктен тиісті құжаттарды сұраттық, бізге құжаттарды жою туралы акті берілді. Михай автокөлік сатып алғаннан кейін оны басқа біреуге қайта сатқан, ол Логвинованың күйеуіне сатады. Сөйтіп, ол соңғы адам ретінде тұтылып отыр, сот орындаушылары оның машинасын, құжаттарын тартып алды", - дейді адвокат.

Омарованың айтуынша, автокөлікті сатып алу кезінде оның кепілге қойылғаны туралы ақпарат болмаған. Кейбір мәліметтер бойынша Михайдың өзі Қазақстан аумағында жоқ. Адвокат ондай адамның өмірде болмауы да мүмкін деп отыр, оның айтуынша, мұндай айла-шарғының Темірбанк қызметкерлерінің араласуынсыз жасалуы мүмкін емес.

Омарова тағы бір жағдайды баяндады. "Екатерина Стороженко - дәрігер, төрт баланың анасы, ол өзінің таныстарымен келісімшартқа отырып, үйін кепілге қойған, әлгі адамдар алаяқ болып шықты. Әйелді алдаған ерлі-зайыпты Ақшолақовтар ғимарат сатып алып, одан Стороженкоға жалға алу төлемінсіз бір кабинетті бес жыл мерзімге береміз деп уәде еткен. Ал банк кепілге қойылған үйді саудаға шығарған, әйел балаларымен бірге далада қалды", - дейді ол. Бұл іс бойынша сот әлі жалғасып жатыр.

Адвокат қазақстандықтарды қорғау үшін заңға өзгерту енгізу қажет деп есептейді. Оның айтуынша, Азаматтық кодекстің 305 - "Кепіл беру" бабын өзгерту қажет. Онда борышкердің өзі немесе үшінші тұлға кепіл беруші бола алады деп көрсетілген. "Демек, несиені біреу алады, ал екінші адам оған өз мүлкімен жауап береді. Несие үшін үшінші тұлға емес, қарыз алушының өзі ғана жауап беруі керек", - дейді ол.

"Мен Темірбанк қызметкерлерінің 2006-2007 жылдардағы әрекеттері заңсыз деп есептеймін. Келісімдерді жарамсыз деп тануға қол жеткізуге тырысамыз. Біз бұл үлкен мәселені Үкіметке дейін жеткізгіміз келеді, жуық арада депутаттарға хат жолдаймыз", - деді адвокат.

Темірбанк АҚ баспасөз қызметі бұл жағдайға байланысты ешқандай түсініктеме бермейтінін мәлімдеді. 

Дереккөз: tengrinews.kz