В Атырау
-1 
Шымкентте полиция сержантының кафе маңында жоғалтып алған Калашников автоматы басқа бір кәуапханадан табылды. Tengrinews.kz тілшісіне бұл туралы Абай ауданы прокурорының орынбасары Ермек Әйтімов хабарлады.
Ол 30 патроны бар автоматты белгісіз біреулер кәуапхана асханасына әкеліп тастағанын айтты. "Кафе жұмысшыларының айтуынша, оқиға кешкісін болды. Кәуапшы біреудің терезеден ішке автоматты лақтырып жібергенін көрген. Ол қаруды жертөлеге жасырған, кейін біреу Абай аудандық ішкі істер бөліміне хабарласып, табылған зат туралы айтқан", - деді Әйтімов.
Қазір құқық қорғау органдары кәуапшының автоматты неге жасырғанын анықтап жатыр. Полицияға қоңырау шалған адамның кім екені тергеу мүддесіне байланысты жария етілмей отыр. Айта кетейік, бұл кафе асханасының терезесіне қаруды тастап жіберу үшін адамға биік дуалдан секіріп өтуге тура келеді, оның үстіне, терезенің декоративті торы бар.
Еске салайық, шымкенттік сержанттың автоматы 24 қыркүйекте жоғалып кетті. Ол кафелердің бірінен түскі ас ішпек болған, қаруын досының машинасына қалдырған. Түскі астан оралған кезде көліктен автоматты таппай қалады. Бұл дерек бойынша "Ұрлық" және "Салақтық" баптарымен екі қылмыстық іс қозғалды. Органда екі жыл қызмет істеген сержант жұмыстан шығарылды. Қалада ҚР ІІМ-нің арнайы комиссиясы жұмыс істеп жатыр.
Дереккөз: tengrinews.kz