Астанада инкассаторға шабуыл жасалды

Фото: ria.ruАстананың орталығында төлем терминалдары инкассаторына шабуыл жасалды, - деп хабарлайды Tengrinews.kz тілшісі.

Таңертең Республика даңғылы мен Абай көшесі қиылысындағы "Турист" қонақүйінің маңы қоршауға алынды. Оқиға орнында криминалистер мен тергеушілер жұмыс істеп жатыр. Криминалды полиция қызметкерлері Chevrolet көлігін мұқият тексеріп жатты. Тергеушілер инкассаторлық жасыл сөмкесі бар жігіттен жауап алды. Ол жәбірленушіге ұқсайды.

Полиция қызметкерлерінің айтуынша, төлем терминалы инкассаторына шабуыл жасалды, әлдекім олардың қолындағы қаржыны алып қашпақ болған. Күдікті оқиға орнынан қашып кеткен.

Оқиға орнынан атыс қаруының пайдаланылған үш гильзасы табылды. Инкассатор шабуыл кезінде оқ атқан болуы мүмкін деген тұспал жасалды.

Астана қаласы ІІД мамандарының мәліметінше, сағат 10.00 шамасында әлдекімдер төлем терминалдары инкассаторын тонап кетпек болды. "Күдікті инкассатордың сөмкесін тартып әкетпек болды. Инкассатор травматикалық тапаншадан ауаға бірнеше рет ескерту оғын атты. Зардап шеккендер жоқ. Тонаушының кім екені шамамен белгілі болды, оны ұстау шаралары қолға алынды", - дейді департаменттің баспасөз хатшысы Софья Қылышбекова.

Дереккөз: tengrinews.kz