Оралмандарға есік ашылды

Кеше Еңбек және халықты әлеуметтік қорғау министрі Тамара Дүйсенова ханым жақсы жаңалығымен бөлісті.  Ендігі жерде Атажұртына оралған ағайындар Қазақстанның кез келген өңіріне қоныстанып, «Оралман» мәртебесіне қол жеткізе алады. Естеріңізде болса, биыл көктемде Үкімет қабылдаған №248 қаулы бойынша оралмандар тек Қазақстанның 7 облысына ғана қоныстануға құқылы болатын. Олар негізінен солтүстік облыстар болатын.

Ал, осы 8 шілдеде қабылданған №783 Үкімет қаулысы бойынша оралмандар Алматы және Астана қалаларынан тыс Қазақстанның кез келген аймағына орын тебе алады.

Еңбек және халықты әлеуметтік қорғау министрлігінің басқарма басшысы Марат Тоқсанбаевтың айтуынша, қандастарымыз қазіргі мүмкіндікті пайдаланып, «Оралман» куәлігін алып, сол арқылы «Ықтияр хатқа» қол жеткізе тұрса, күзге қарай оларға азаматтық беру мәселесі оң шешімін табады. 

Бұл деген сөз Қазақстанның қай түкпіріне барсада оралмандарға есік ашық деген сөз. Айталық, Алматы облысына қоныстанып, құжат мәселесін реттей алмаған 100-ге жуық отбасы енді кері қайтпайды. 

Дереккөз: Abai.kz