Электрондық үкімет порталы 2015 жылға қарай жаңа 20 электрондық қызметті ұсынады

Астана қаласында түрлі мемлекеттік органдар өкілдерінің қатысуымен өткен отырыста жаңадан 20 қызметті автоматтандыру жоспары бекітілді.

«Мемлекеттік қызметтерді автоматтандыру және оңтайландыру дегеніміз - мемлекеттік қызметті көрсетуде талап етілетін құжаттардың санын азайту, өтінімді қарау мен құжатты рәсімдеу мерзімін қысқарту және құжаттарды электрондық форматқа көшіру үдерісін жеңілдету», - деп түсіндірді ҚР  Байланыс және ақпарат агенттігінің Электрондық қызметтерді және ХҚКО дамыту департаментінің директоры Абылайхан Оспанов.

Айталық, «ҚАЗТЕСТ» жүйесі бойынша жүргізілетін мемлекеттік тілді меңгеру деңгейін бағалауға қатысу үшін құжатты электрондық үкімет порталы арқылы тапсыруға болады. Сондай-ақ, заңды тұлғалардың, олардың филиалдары мен өкілдерінің құрылтайшылық құжаттарына енгізілген өзгертулер мен толықтыруларды тіркеуге, жылжымайтын мүлікке құқық белгілейтін құжаттардың түпнұсқасын, спорттық атақтар мен санаттарды алу үшін құжат тапсыруға, спорттың түрлері бойынша республикалық қоғамдық бірлестіктерді аккредиттеу туралы куәлікті алуға болады.

Бұдан басқа, Ауыл шаруашылығы, Көлік және коммуникациялар, Қоршаған ортаны қорғау және су ресурстары министрліктерінің қызметтерін автоматтандыру, оларды электрондық үкімет порталы арқылы ұсыну жоспарланған.  

Еске сала кетейік, 2013 жылы электрондық үкімет арқылы 38 млн., 2014 жылдың басынан бері 22,8 млн. қызмет көрсетілген. Күн сайын электрондық үкімет порталына орта есеппен 43 мың пайдаланушы кіреді.

Дереккөз: ҚазАқпарат