Қазақстан азаматтарының Грузияға кіре алмауына байланысты ҚР СІМ осы елдің Елшісіне нота тапсырды

Биылғы сәуірдің ортасында ҚР Сыртқы істер министрлігі Консулдық қызмет департаментінде Грузияның ҚР-дағы Елшісіне Қазақстан азаматтарын Грузияға кіргізуден бас тарту жағдайларына байланысты ресми нотаны тапсырды.

«Биылғы сәуірдің ортасында ҚР Сыртқы істер министрлігі Консулдық қызмет департаментінің директоры Нұрлан Қасымқұловтың Қазақстандағы Грузия Елшісі Зураб Патарадземен кездесуі өтті. Онда осы елдің дипломатымен Қазақстан азаматтарын Грузия аумағына кіргізуден бас тарту оқиғаларының жиілеп кетуіне байланысты мәселе талқыланды. Атап айтқанда, кездесу барысында ҚР азаматтарын Грузияға кіргізуден бас тарту себептерін анықтауға көмек көрсету өтінішімен Грузия Сыртқы істер ведомствосына Қазақстан СІМ атынан ресми нота тапсырылды», - деді ҚР СІМ баспасөз хатшысы Нұржан Айтмаханов ҚазАқпарат тілшісінің сауалына жауап беру кезінде.

Белгілі болғандай, Грузия Елшісіне сонымен қатар аталған мәселе бойынша кейбір Қазақстан азаматтары өтініштерінің көшірмесі де ұсынылған.

Баспасөз хатшысының сөзіне қарағанда, Нұрлан Қасымқұловпен кездесу барысында Зураб Патарадзе ТМД елдерінен келген рейстерде осындай оқиғалар орын алғанын және бұл ақпаратты өзінің басшылығына жеткізетіндігін атап өтті. Сонымен бірге, Грузия Елшісі депортация оқиғаларының жақында өзінің елінде трафикпен және адам саудасымен күрес бойынша өткізілген шаралармен жанама байланысы болуы ықтимал екенін түсіндіріп бақты.

Сөз соңында Зураб Патарадзе екі ел арасындағы достық қарым-қатынастарды ескере отырып, сондай-ақ 2014 жылдың Грузиядағы қазақстандық туризмнің жылы деп аталуына байланысты грузиндік тарап Қазақстан туристерінің сапарларына барынша қолдау білдіруге дайын екенін атап өткен.

Дереккөз: ҚазАқпарат