Көкпекті ауылындағы ТЖ бойынша қылмыстық іс қозғалды, құрбандардың саны 5 адамға жетті

Қарағанды облысы Бұқар жырау ауданының Көкпекті ауылын су басып кету фактісі бойынша қылмыстық іс қозғалды. Су тасқыны салдарынан 5 адам көз жұмды, деп  хабарлайды BNews.kz агенттігі облыстық ІІД басшысы Мергенбай Жаппаровқа сілтеме жасап.

«ТЖ фактісі бойынша қылмыстық іс қозғалды, тергеу амалдары жүріп жатыр», - деді М.Жаппаров.

ТЖ жөніндегі министр Владимир Божко мәлімдегендей, су тасқынынан 5 адам құрбан болды. 

«Бес адам көз жұмды, 100-ге тарта үй су астында қалып отыр, екі үй мүлде құлап қалды. Қалған үйлерде де су өте көп», - деді В.Божко.

Аймақ билігі хабарлағандай, барлық зардап шеккендердің шығындары қайтарылады, ал қаза тапқандардың отбасыларына көмек көрсетіледі. 

Естеріңізге салып өтсек, 31 наурызда сағат 1.30-да Көкпекті су қоймасының плотинасы шайылып, Көкпекті кентіндегі 100 үйді биіктігі 1,5-18 метр су басып қалған (ауылда 810 үй бар). Сағат 2.45-те кенттегі су деңгейі төмендеді.

Дереккөз: Қазақстан жаңалықтары АА.