«ІІБ-9» ісі: Барлығына үкім шықты

Бүгін, 28 желтоқсанда Атырау облыстық қылмыстық істер жөніндегі мамандандырылған ауданаралық сотында судья Дәуренбек ДАУМОВ Атырау қалалық ІІБ-нің тоғыз полицейіне қатысты атышулы істің қалған 4 фигурантына шығарылған үкімді оқыды. Естеріңізге салсақ, қалған 5 сотталушыға шығарылған үкім кеше, 27 желтоқсанда жария етілген болатын.

Азамат ДОСТАНОВ пен Ильяс СТАМҒАЛИЕВ ҚР ҚК-нің 362-бабының 2-тармағы («Лауазымды адамның билікті асыра пайдалануы») және 369-бабының 2-тармағы («Лаузымды адам жасаған қызметтік жалғандық») бойынша кінәлі деп танылып, жалпы режимдегі колонияда 3 жылға бас бостандығынан айырылу үкімі кесілді.

Ернар ІЗДІБАЕВ пен Нұржан ОРАЗҒАЛИЕВ ҚР ҚК-нің 416-бабының 4-тармағы («Қылмыстық сот iсін жүргізу барысында дәлелдемелерді бұрмалау») және 412-бабының 1-тармағы («Көрiнеу кiнәсiз адамды қылмыстық жауаптылыққа тарту») бойынша кінәлі деп танылып, жалпы режимдегі колонияда 3 жылға бас бостандығынан айырылу жазасын алды.

Төртеуі де өмір бойына офицерлік атақтарынан айырылды.

Сотталушылардың адвокаттары үкімге қатысты жоғары сот инстанцияларына шағымданатындарын мәлімдеді.

Марат ТАКУЛИН

Суретті түсірген автор