Мақат аудандық соты адам өлтірді деп айыпталған 45 жастағы Доссор поселкесінің тұрғынына үкім шығарды.
Оқиға осы жылдың сәуірінде Доссорда болған. Жергілікті үш тұрғын кездесіп қалып, бірінің үйінде ішпек болады. Кейін екі ер адамның арасында келіспеушілік орын алып, үйдің иесі олардан сыртқа шығуларын өтінеді. Екеуі сыртқа шығып бара жатқанда біреуі қолына асүйдегі пышақты іле кетеді. Сол пышақты қарсыласының кеуде тұсына салады. Жәбірленуші алған дене жарақатынан ауруханада көз жұмды.
Мақат ауданы прокурорының орынбасары Мақсат ШАРИПОВТЫҢ хабарлағанындай, сотталушы ҚР ҚК-нің 106-бабы 3-тармағы («Денсаулыққа қасақана ауыр зиян келтiру») бойынша кінәлі деп танылып, 8 жылға бас бостандығынан айыру жазасына кесілген.
Ләззат ҚАРАЖАНОВА