«Әнет» ШҚ төрағасы Жәнібек АРАЛБАЕВ:
- Ауыл шаруашылығы вице министрі А.Бердалин сыбайлас жемқорлыққа байланысты Қағиданың өзгергенін айтты. Ауыл шаруашылығында қайдағы жемқорлық, фермерде үкіметті тонайтындай жағдай бар ма еді, олар өз қамын өздері жасап отырған шаруа адамдары емес пе?
(«АЖ»-ға берген сұхбатында айтылды)
Атырау облысының әкімі Серік ШӘПКЕНОВ:
- Атырау қаласын инфрақұрылымдық дамыту жоспары жыл басында бекітілді, талқылауға және әзірлеуге барлық бейінді ведомство қатысты. Құрылыс маусымы қызу жүріп жатқанымен, нәтиже – көңілден шықпай отыр. Орталық көшелерде шұңқырлар бар, ал әрбір екінші жоба әлі қаралып жатыр.
(Атырау қаласындағы жол құрылысы мәселесі бойынша өткен кеңесте айтылды)
Қазақстан Республикасының Президенті Қасым-Жомарт ТОҚАЕВ:
– Қытай біз үшін жай ғана жақсы көрші емес, жақын дос әрі уақыт сынынан өткен сенімді серіктес.
(Ақордада ҚХР Төрағасы Си Цзиньпинмен келіссөздер барысында айтылды)
Премьер-министрдің орынбасары Қанат Бозымбаев:
- Әкімдіктер (су тасқынынан зардап шеккендер үшін - Ескерту) жиһаз бен техника сатып алуға міндетті емес. Егер қазір үйлерге жиһаз бен техника қойылып жатса, бұл - демеушілердің есебінен алынған қосымша заттар. Сондықтан әкімдіктер өздері техника да, жиһаз да сатып алмайды.
(Су тасқынынан зардап шеккен тұрғындардың үйлеріне сапасыз тұрмыстық заттар сатып алынғаны туралы айтылды)
Махамбет және Индер аудандарының тұрғындары:
- Ешкім ерігіп жүрген жоқ, жолды неге жасамай отыр? Тасқын су қайтып, қалада қапшықтарды жинап жатыр, ал екі ауданның халқы тентіреп жүр, бұл не масқара?! Ең болмаса, уақытша болса да жүзбелі өткел, қайық қойса да бір шарасын алатын уақыт болды ғой... Жолдың осындай болу себебінен аудандарда кейбір азық-түлік тапшылығы сезілуде. Саудагерлер мынадай астаң-кестеңі шығып жатқан жолдан тауар тасу пайдасыз дейді. Ал Орал қаласынан әкелу тиімсіз көрінеді. Сонда айналып келгенде халық зардабын тартып жатыр.
(«Ақ Жайық» газеті редакциясына жазылған хаттан)
Махамбет селосының тұрғыны Александр БУКИН:
- Шөлден қаталап барамыз, балалар ішетін су сұрайды. Шыдамымыз бітті. Бұл жағдайға биліктің әлі келмей отыр. Жайықтың суын ішкеннен басқа амалымыз жоқ...
(Ауыз су мәселесінің шешілуін үш ай күткеннен кейін айтылды)
Атырау облысы ТЖД басшысының орынбасары Руслан ШАРИЕВ:
- Су тасқынының шарықтау шегіне жеттік, Жайық өзеніндегі су деңгейі төмендеп келеді.
(2024 жылғы 4 маусымда төтенше жағдайлар жөніндегі штабта айтылды)
Сағыз ауылының тұрғыны Жанаргүл ШҮРЕНБАЙ:
- Қайғыдан қан жұтып отырмын. Ер жетіп, азамат болғанда полиция қуып, құлатып, басынан басып, өлтіріп отыр. Ұлым қылмыскер емес. Жасы бар болғаны 17-де еді. Қуатындай қандай себеп болды соншама? Бұл заңсыздықты кім қашан тоқтатады? Полиция бөлімінде не боп жатыр? Біреу адамды пышақтайды, екіншісі қызметті көлігімен жасөсөпірімді басып өлтіреді. Онымен қоймай, болған оқиға сызбасын дұрыс жасақтамайды. Бұл не, полицияның білімсіздігі ме? Бұл заңсыздық қашан тоқтайды?.
(Әлеуметтік желідегі жеке парақшада жарияланды)
Журналист, стратегиялық коммуникация маманы Дана САУДЕГЕРОВА:
- Митингілер туралы мемлекеттік хабарламалар қандай болды: ресми пресс-релиздерде халықтың талабы туралы бірде-бір сөз болған жоқ, мемлекеттік және мемлекетке жақын БАҚ пен блогерлердің сюжеттері мен ленталарында - наразылық болған жоқ болмаған да. Мемлекеттік коммуникация мамандарының айтуынша, мына жүздеген адам жоқ. Бәрі керемет.
(Commedia kz телеграм каналында айтылған)
Атырау облысы әкімінің орынбасары Жасұлан БИСЕМБИЕВ:
- Атырау облысында тасқынмен күрес жағдайы әлі де күрделі болып тұр. Қазір Жайық өзенінің негізгі суы Атырау облысының аумағына кірді.
..қазіргі таңда Бесікті, Алмалы, Талғайраң, Ақжар, Ақсай мөлтек аудандары қауіпті аймақ ретінде қалып отыр. Осыған байланысты, қала көлемінде бөгеттер бойында тәуліктік кезекшілік ұйымдастырылды. Осындай кезекшілік Махамбет, Индер аудандарында да жалғасуда.
(2024 жылғы 13 мамырда Атырау облысының ТЖ бойынша жедел штабының отырысында айтылды)
Facebook әлеуметтік желісінде пікір білдіруші:
- ТЖМ таратқан хабарламалары қорқынышты болды. +20 көрсеткенде қатып қалған ба әлде өрт шығу қауіпі жоғары жерге тап болу ма - қайсысы қауіпті екенін бірден түсіну қиын. Әсіресе су тасқыны қаупі төніп тұрғанда мұндай хабарламаны қабылдау оңай емес...
(Әлеуметтік желіде жарияланды)
Құлсары қаласының тұрғындары:
- Үй, тұрмыстық техника, жиһаз, жөндеу жұмыстары, көлік - осының бәріне біртіндеп өтеп жатқан несие рәсімдеу арқылы қол жеткіздік. Енді бәрі жоқ болды. Жылойлықтардың несие рәсімдерінің күшін жою керек деп есептейміз.
(«АЖ» сұхбатында айтылды)
Атырау облысы әкімінің орынбасары Жасұлан БИСЕМБИЕВ:
- Иректі су қоймасындағы судың негізгі бөлігі Қазақстан мен Ресей шекарасында арнасынан тасып, бізге келетін судың жылдамдығы бәсеңдеді. Сондықтан, біздің болжам бойынша үлкен су Атырауға сәл кішігіп келеді.
(19 сәуірдегі брифингте айтылды)
ҚР Президенті Қасым-Жомарт ТОҚАЕВ:
– Ашығын айтсақ, төтенше жағдайдың алдын алу ісінде айтарлықтай олқылықтар бар. Бұл – жылдар бойы шешімін таппаған мәселелер. Ең алдымен – білікті мамандардың тапшылығы. Тиісті ғылыми қорытынды сапалы жасалмайды.
(Ғылым және технологиялар жөніндегі ұлттық кеңестің отырысынды айтылды)
Облыс әкімінің орынбасары Жасұлан БИСЕМБИЕВ:
- Атырау Құлсарының кебін киюі мүмкін.
(Атырау облысының тұрғындарына үндеуінде айтылды)
«Глобус» экологиялық-құқықтық бастамалар орталығының директоры Галина ЧЕРНОВА:
- Залдағы тыңдауға қатысушылардан және зум алаңы арқылы қойылған барлық сұрақтарға компания менеджерлері компания ауаның да, теңіздің де ластануына жол бермейді деп жауап берді. NCOC мамандары мен жоба әзірлеушілерінің баяндамаларында және таныстырылымдарында компанияның біздің өңірдің қоршаған ортаға шығарындылары мен төгінділерін «нөлдік» деңгейде ұстауға ұмтылатыны айтылды. Бірақ бұл солай ма? Ғарыштан көрінген дақ мүлде керісінше жағдай екенін көрсетеді. Ал деректің аты дерек екені белгілі...
(Қашаған кен орны маңында спутник арқылы мұнай төгіндісінің анықталуына қатысты жеке FB парақшасында айтылған)
"ҚазМұнайГаз" ҰК" АҚ басқарма төрағасының орынбасары Дмитрий МАКЕЕВ:
- Әлеуметтік желіде және кейбір БАҚ-та Атырау және Павлодар мұнай-химия зауыттарын жекешелендіру жоспарланып отыр деген ақпарат тарады. Бұл ақпараттың шындыққа жанаспайтынын ресми түрде мәлімдегім келеді. Мұндай келіссөздер жүргізілген жоқ.
("Қазмұнайгаз" ҰК" АҚ баспасөз қызметі таратқан жауапта айтылды)
Сурет: 24.kz
Атырау облыстық адвокаттар алқасының мүшесі Нұрлан ЖОЛБОЛОВ:
– Атырау облысы тұрғындарының тірі ағзасы арқылы, өкпесі, қаны арқылы өтетін мыңдаған тонна у! Тек Қазақстандағы мұнай өндіру мен өңдеудің 33 жыл кезеңінде қоршаған ортаға айтарлықтай кері әсерін тигізетін нысандар ауамызға үш миллион тонна улы ластаушы заттарды шығарды. Осы жылдар ішінде төрт тоннадан астам аса қауіпті улы химиялық зат Атырау облысының әрбір тұрғынының үлесіне тиді. Ал сіз мені мұнда не үшін отыр деп сұрайсыз. Иә, өйткені мен де осы қаланың тұрғынымын, өзімнің және менің отбасымның немен тыныс алып жатқанына бей жай қарай алмаймын.
(Алғашқы экологиялық форум қорытындысы бойынша өткен баспасөз мәслихатында айтылды)
«АЖ» оқырманы:
– Жол полициясы инспекторларының жылдамдықты шектеуге қатысты талаптары заңды шығар, сол сияқты азаматтардың талап қоюының да заңды күші бар. Салынған айыппұлдарды «Қазавтожол» үкіметпен бірлесе отырып өтеуі керек, себебі олар республикалық жолды жөндеуді ұзақ жылға созып, бұл учаске қазір өте қауіпті болып тұр. Соның салдарынан осы жолда көптеген оқыс оқиғалар орын алып, қанша жүргізуші мен жолаушының өмірі қиылды.
(«Астрахань жолындағы «кибер-шериф» жылдамдықты 60 км/сағ асырғаны үшін айыппұл салады» атты мақалаға қатысты қалдырған пікір)
ҚР Ғылым және жоғары білім министрі Саясат НҰРБЕК:
- 90 жылдары көп ғалымдарымыз шетелге кетіп қалды. Қарапайым мысал: егер 90 жылдары Қазақстанда 52 мың ғылыми қызметкер болса, он жылдан кейін 2000 жылы олардың 12 мыңы-ақ қалған. 35 мыңынан, яғни кеңес ғалымдарының үшінші буынынан айырылып қалдық. Елшіліктермен бірігіп база құрдық, жетекші ғылыми институттар мен университеттерде жұмыс жасайтын біздің жас немесе тәжірибесі бар 680 ғалым бар. Біз оларды анықтадық. Енді оларды елге қайтарудың жолын қарастырып жатырмыз.
(Парламент мәжілісінің пленарлық отырысында айтылды)
Сурет: gov.kz
ҚР Бас прокурорының орынбасары Әсет ЧИНДАЛИЕВ:
- Рысқалиевке сырттай шығарылған сот үкімі бар. Өкінішке қарай, бізде Лондонмен сотталғандарды беру және алмасу туралы келісім жоқ. Біздің құқық қорғау органдары тиісті келісім болмаса, ештеңе істей алмайды... Әрине, мұндай келісім жасауға өтініш (Ұлыбританияның құқық қорғау органдарына - АЖ) болды, бірақ оның қаншалықты орындалып жатқанын білмеймін.
("АЖ" сауалына берген жауапта айтылды)
Қазақстан Республикасы Ішкі істер министрінің орынбасары Игорь Лепеха:
- Меніңше, кастрация азаптауға жататын сияқты. Екіншіден, Денсаулық сақтау министрлігіндегі әріптесім кастрация мәселенің шешімі емес, өйткені педофилия басқа органдардың емес, бастың проблемасы екенін айтады. Сондықтан мұны барлық мүдделі мемлекеттік органдар кешенді түрде шешуі қажет. Мен бұған қарсымын немесе қаламаймын деп тұрған жоқпын. Бірақ бұл адамдар (педофилдер) өмір бойына бас бостандығынан айырылып, мәселе шешілген болса, онда бұл кастрацияны жасаудың мәнісі бар ма?
(Мәжілістің жалпы отырысында әйелдер мен балалардың құқықтарын қорғауға қатысты заң жобасын талқылау барысында айтылды)
«Атырау облысы Су Арнасы» КМК коммуналдық мекемесінің басшысы Мейірім ҚАЛАУИ:
– Коммуналдық кәсіпорынның тізгінінде «жер жұмысында» тәжірибесі бар адам болуы керек дегенге келісемін. Бірақ ол ең алдымен ұйымдастырушылық қабілеті жоғары менеджер болуы керек.
(«АЖ«-ға берген сұхбатында «Атырау облысы Су Арнасы» КМК басшысы қызметіне тағайындалғаны туралы сұраққа жауап бергенде айтылды)
ҚР Парламенті Мәжілісінің депутаты Анас БАҚҚОЖАЕВ:
- Еркектің ең сорлысы ғана әйелге қол көтереді. Дегенмен, ұрыстың бәрі бірден ұрудан шықпайды ғой. Ерлерді де түсінуіміз керек. Жанжал неден туындайды? Әрине, кей жағдайда әйелдің тілінің ұзын болуынан. Мені (осы сөзім үшін) әйел адамдар кешірсін. Бірақ ондай да фактілер бар. Қазақта «жақсы әйел ырыс, жаман әйел ұрыс» немесе «ерге жаққан әйел елге де жағады» деген сөз бар. Біз қазақы тәрбиеден алшақтап бара жатырмыз.
(Тұрмыстық зорлық-зомбылыққа қатысты жазаны күшейтетін заң жобасының таныстырылымында айтты).
KEGOC корпорациясының бұрынғы басшысы, энергетика саласының сарапшысы Әсет НАУРЫЗБАЕВ:
– Қазақстанды тек атом электр стансасы ғана электр энергиясымен қамтамасыз ете алады деген өтірікті біз әлденеше рет әшкереледік. Біз болашақта электр энергиясына деген сұранысты толық өтей аламыз, бұл жерде тапшылық емес, қайта жаңартылатын энергияның көмегімен толтыруға болатын сұраныс бар, бүкіл әлемде солай жасалып жатыр. Өйткені бұл бүгінгі күні мүмкіндіктің ең арзаны. Егер сыбайлас жемқорлыққа жол берілмесе, онда ешқандай апат болмайды.
(Liter.kz сайтына берген сұхбатында айтылды)
ҚР Парламент Мәжілісінің депутаты Сергей ПОНОМАРЕВ:
- Алматыда жер сілкінгенде азаматтарды ескерту жүйесіндегі кемшіліктер байқалды. Тек Google андроид жүйесі арқылы алматылықтарды хабардар етті. Біз бұл туралы ақпаратты Төтенше жағдайлар министрлігінен емес, ұлттық оператордан емес, жаһандық қызметтерден алдық. Сондықтан мұндай жағдайда бізді кім ескертуі керек? Билл Гейт пе әлде Илон Маск па? Ескерту жүйеміздің несі дұрыс емес? Неліктен байланыс арналары жұмыс істемейді? Осы заң жобасы бойынша біз қандай шешім таба аламыз?
(Мәжілістің пленарлық отырысында заң жобасын талқылау барысында айтылды)
Атыраулық белсенді Макс БОҚАЙ:
- Полиция қызметкерлері, бүкіл авторитарлық мемлекеттің репрессивтік аппараты халық мұнайшыларға болысады немесе үлгі алады деп қорқып отырған шығар деп ойлаймын.
(«АЖ»-ға берген сұхбатында айтылды)
Халық жазушысы Мұхтар МАҒАУИН:
Елін жерімен қосып сатып жіберген патша бізге ғана бұйырды
...халқын, елін жерімен қосып сатып жіберген патша бізге ғана бұйырыпты. ...Басында үміт еттік, әрине. Президент болып отырғаннан кейін бірден байқадым, бұл кездейсоқ келген адам еді ғой. Бұл – отарлық үкіметтің қойған адамы. Одан ары қарай отарлай беру үшін.
(halyq-uni.kz-ке берген сұхбатында айтылды)
Қазақстан Республикасының Президенті Қасым-Жомарт ТОҚАЕВ:
- Меніңше, қасіретті Қаңтар оқиғасына жылдар бойы қордаланған әлеуметтік-экономикалық проблемалар, жалпы тоқыраудың билік пен қоғамды аздырып-тоздыруы себеп болды.
(«Egemen Qazaqstan» газетіне берген сұхбатында айтылды)
Қуандық Бишімбаевтың әкесі Валихан БИШІМБАЕВ:
- Ата-ана ретінде ұлымыздың Салтанаттың (Нукенованы - ред.) өмірін қию ойы болмағанына сенеміз. Олар отбасын құрып, өмір бақи бірге жүруге ұмтылды. Олар Салтанатқа киім-кешек бөлмесін жасау үшін пәтерде жөндеу жұмыстарын да бастап кеткен еді. Екеуі де балалы-шағалы шаңырақ болуды армандады. Сол қаралы 9 қараша күні не болды? Оны біз де білмейміз. Бірақ, ұлымның оған зұлымдық жасау ойы болмағанына сенімдіміз деп тағы да қайталаймын.
(«Ертысбаевlive» YouTube-каналына Салтанат Нүкенованың өтіліне қатысты іс бойынша үндеуінде айтылды)
Құлсары қаласының тұрғыны Айжан ЕРДЕНҚЫЗЫ:
- Пәтерімізді 8,4 млн теңгеге бағалады. Ондай қаржыға Атырау өңірінен баспананы қайдан табамыз? Сол қаражатқа Құлсарыдан үй іздеп қарағанмын. 5-қабаттағы жөндеусіз тұрған 2 бөлмелі пәтердің өзі 9-10 млн теңге тұрады. Жетпей тұрған ақшаны тапқан күнде де отбасындағы жеті жан ол екі бөлмеге қалай сиямыз. Қалған 2 миллион ақшаны қайдан аламыз? Несие алуым керек пе? Оны төлеуге шамамыз жетпейді.
("АЖ"-ға берген сұхбатында айтылды).
Қазақстандық саяси шолушы Ғазиз ӘБІШЕВ:
- Қазақстан инфрақұрылымы үшін өзіңіз көріп отырғандай, қыс аяқ астынан келді. Премьер-министр Смайылов пен оның орынбасарлары бірнеше ай қатарынан келесі жылу маусымына дайындық туралы ғана айтып келді. Ал енді аяз түрғанда, инфрақұрылым көз алдымызда құлдырай бастады. Үкіметтегі шенеуніктердің кепілдік бергені қаншалықты сенімді екеніне тағы да көз жеткіздік. Мемлекеттік жүйе өзін-өзі алдап, қоғамды адастырумен айналысатын жерде азаматтық қоғамның өмірлік маңызды үдерістерді бақылауға алу мүмкіндігі болуы керек.
(телеграм-каналында жазылды)
Қазақстанның Парламент Мәжілісі төрағасының орынбасары Павел КАЗАНЦЕВ:
- Егер әкімдер мен депутаттардың халықпен байланысы үзіліп, елдегі азаматтардың талап-тілегін біліп, мүддесін қорғамаса, проблемаларына үңілмейтін болса, онда біз барынша қатаң және принципті түрде әрекет етуіміз қажет. Ондай адамдармен жолымыз бір емес.
(Партиялық бақылау комитетінің отырысында айтылды)
Атырау облысының экология жанашыры Жәукен КӨШЕНОВ:
– Бізге шұғыл шаралар алу керек. Жергілікті халық Каспий теңізінің тайыздануынан зардап шегіп отыр. Балық аулайтын ауылдар күнкөрісінен айырылады. Су тартылған соң ол батпақ болып, шаңға айналады, оның бәрі адамға зиян.
(Астанада қоғамдық ұйымдар, саяси партиялар мен бейінді министрліктердің өкілдері қатысқан дөңгелек үстелде айтылды)
Гидрогеология ардагері Едіге САБУРОВ:
- Бүкіл әлем климаттың өзгеруіне байланысты суды үнемдеуге тырысып жатқанда, су қорғауды қажет ететін ресурсқа айналған заманда, біз ол үшін қыруар ақша төлеп, оны қала сыртына төгіп, әлі де онымен күресіп жатырмыз.
(«АЖ» сұхбатында айтылған)
В Атырау -1 