Бұрынғы қалалық саябақтың орнына тұрғын үй кешені салынады

Атырау қаласының тарихи бөлігіндегі бос жатқан жерді әкімдік бұрын осында жаңа саябақ салуды жоспарлағанымен, «Атырауинжстрой» ЖШС-не сатып жіберген. 

Облыс орталығының оң жағалауы бірте-бірте үлкен құрылыс алаңына айналып келеді. Пандемия кезінде саябырсып қалған жұмыстар биыл ескі ғимараттарды кезең-кезеңімен ауқымды бұзу аясында қайта жалғасып жатыр. Пушкин – Жарбосынов – Балғымбаев – Шевченко көшелерінің периметрінде орналасқан бұрынғы ескі қалалық саябақтың көптен бері бос жатқан аумағы да қоршауға алынған. 

Біздің жазбаша сауалымызға қала әкімдігі 2016 жылы Үкімет қаулысымен бекітілген бас жоспарға, сондай-ақ 2021 жылы қала әкімі қол қойған егжей-тегжейлі жоспарлау жобасына сәйкес, бұл жерге саябақ орнатқылары келгенін хабарлады. Бірақ бүкіл жоспарға қарамастан, 2020 жылдың желтоқсан айында жер «Атырауинжстрой» ЖШС-не «сауда және әлеуметтік мақсаттағы нысандары бар көп функциялы әкімшілік-тұрғын үй кешенін» салу үшін сатылды.

Әкімдіктегілер мұндай өзгеріске не себеп болғанын түсіндірмеді, тек құрылыс салушының эскиз жобасы мен сәулет-жоспарлау тапсырмасын (СЖТ) әлі мақұлдатпағанын атап өтті. 

«АЖ» редакциясы «Атырауинжстрой» ЖШС-не сауалмен жүгінген еді, ол жер телімін алу фактісін растады. «Серіктестік уәкілетті органдарға мақұлдату үшін эскиз жобасын және СЖТ әзірлеп жатыр», - деді компания. 

Сіздің тілшіңіз бұл бос жердің тарихын 20 жылдан бері қадағалап келеді. Жүз жыл бұрын бұл жерде бас қала алаңы болды. Оның ортасына 1920 жылдары ақ казактар атқан алғашқы совдептіктер, сондай-ақ көтерілісшілермен шайқаста қаза тапқан Гурьев қорғаушылары жерленген. 30-жылдары комсомолдар мен пионерлер бейіт айналасына қалалық саябақ отырғызып, өсірді. Сол жерде ондаған жыл бойы обелиск - еске алу шаралары және мектеп оқушыларын пионерлер қатарына қабылдайтын жер болды.

КСРО ыдырағаннан кейін саябақ бірте-бірте қараусыз қалып, ағаштар кесілді. Ал тек қираған құлпытас қана бауырластар зиратының болғанын айғақтап тұрды. Ақырында, 2000 жылдардың басында қала әкімдігі бейітпен бірге қалалық саябақтың аумағын жеке құрылыс салушыға сатып жіберді. Содан бері мұнда бұған бей-жай қарамайтын кәсіпкерлер қаржысына екі рет (2005 және 2018 жылдары) қазба жұмыстары жүргізіліп, кейін табылған сүйектерді қайта көму жұмыстары жүргізіліп, қаңырап бос қалған жерлер мемлекет меншігіне қайтарылды. 

Биліктің осы учаскеге қатысты жоспары әлденеше рет өзгерді: олар бұл жерде Сланов кітапханасы үшін, содан кейін мемлекеттік мұрағат үшін, содан кейін Достық үйі үшін жаңа ғимарат салғысы келді. Содан соң саябақ салу тарихи тұрғыдан дұрыс болар еді. Бірақ ақыр аяғында кезекті тұрғын үй бой көтеретін болды. 

Лев ГУЗИКОВ 

Суретті түсірген Еламан НУХИН