Жақын арадағы 10 күн ең қауіпті болады деп ойлаймын –Тоқаев

Президент Қасым-Жомарт Тоқаев Солтүстік Қазақстан облысының су басқан аумағын тікұшақпен аралап көргеннен кейін қарғын су салдарынан эвакуацияланған аудандардың халқымен кездесті, деп хабарлайды Azattyq Ruhy. 

Ақорда хабарлағандай, Қасым-Жомарт Тоқаев шығындарды өтеу үшін мемлекет  тиісті шаралардың барлығын қабылдайды деді.

Мемлекет басшысы ешбір азамат назардан тыс қалмайтынын атап өтті. 

“Қазір бәріміз өте күрделі кезеңді бастан кешіп жатырмыз. Бұл – жалпыұлттық апат. Дегенмен, бір жағынан алып қарасақ, оң өзгерістер де анық байқалады. Судың беті қайтып келеді. Жақын арадағы 10 күнде өте қауіпті болады деп ойлаймын. Бірақ біз еліміз бойынша апат салдарын жою шараларын қабылдап жатырмыз. Бұған дейін айтқанымдай, Үкімет зардап шеккен азаматтардың барлығына қолдау көрсетеді. Біз су тасқыны салдарынан болған барлық шығынды өтейміз. Әрбір азамат, әрбір отбасы мемлекеттің қамқорлығында болады. Бұл – мен үшін басты міндет”, – деді Қасым-Жомарт Тоқаев.