Бүлінген мемлекеттік нысандар 20 ақпанға дейін жөнделеді

Индустрия және инфрақұрылымдық даму министрлігі елдегі жаппай тәртіпсіздіктер кезінде бүлінген мемлекеттік нысандарды 20 ақпанға дейін жөндеуді жоспарлап отыр, деп хабарлайды Sputnik Қазақстан тілшісі.

Индустрия министрі Қайырбек Өскенбаевтың айтуынша, әкімдіктердің жедел деректеріне сүйенсек, республикада жаппай тәртіпсіздіктер кезінде 8 өңірде 53 мемлекеттік нысан мен шағын және орта бизнестің 151 объектісі зардап шекті.

"Әкімдіктер бүлінген нысандардың нақты санын күн сайын жаңартып отырады", - деді ол үкімет отырысында.

Мемлекеттік комиссия бірыңғай іс-қимыл алгоритмін әзірледі. Бүлінген нысандарды қалпына келтіру бойынша нақты мерзім белгіленді.

"Барлық өңірде келтірілген залалды тексеру және бағалау жөніндегі комиссия құрылды. Бүгінгі таңда ақаулы актілер жасалып, техникалық тексеріс жүргізілуде. Кейін жедел тәртіпте күрделі жөндеу және қайта құруға жобалық-сметалық құжаттама әзірленеді", - деді министр.

Бұған қоса, ол барлық өңірде қалалық автобус, теміржол вокзалы мен жолаушылар, жүк пойыздарының қозғалысы толығымен қалпына келтірілгенін атап өтті. Республикалық маңызы бар автожолдар ашық.

Елдегі 20 әуежайдың 18-і штаттық режимде жұмыс істейді.

Алматы мен Талдықорған әуежайларының қызметі ғана тоқтатылды. Бұл ретте Алматы қаласының әуежайы қызметін қайта бастауға дайын. Құзыретті арнайы органдардың тиісті шешімі қажет, деді Өскенбаев.