«Құрық» теңіз порты фельдшерінің үйінен 50-ге жуық жалған ПТР тест табылды, деп хабарлады ҚазТАГ Қазақстанның ішкі істер министрлігінің баспасөз қызметіне сілтеме жасап.
«ІІМ Тергеу департаментінің әскери-тергеу басқармасы Маңғыстау облысының «Құрық» теңіз порты арқылы мемлекеттік шекараны кесіп өтетін адамдарға ПТР-тестілерді қолдан жасап, сатумен айналысқан тұрғындардың әрекетін әшкереледі. Жедел-тергеу іс-шаралары барысында бір топ адам, оның ішінде осы теңіз портының фельдшері ұзақ уақыт бойы ПТР-тесттерді қолдан жасап, қазақстандықтарға және шетел азаматтарына сатып отырған».
Полиция нақтылағандай, «21 жастағы порт фельдшері Қазақстан аумағына шығатын және кіретін жолаушылар үшін ПТР-тестілерді қолдан жасап, сыбайластары арқылы сатқан».
«Жалған тестілердің бағасы 3 000 теңгеден 10 000 теңгеге дейін құбылып отырған. Тұрғылықты жері бойынша тергеу әрекеттерін жүргізу кезінде күдіктіден сатуға дайын 48 жалған ПТР-тест, ноутбук, принтер және тиісті құжаттар дайындауға қажет басқа да техникасы тәркіленді», - деді ведомствода.
Сотқа дейінгі тергеу амалдары басталды.
«Оның барысында тергеу күдіктілердің қылмыстық іс-әрекетінің нақты ауқымы және мемлекеттік шекарадан заңсыз өткен адамдардың саны анықталып жатыр», - деп атап өтті ІІМ.