Жылыой ауданының әкімі Халел ЖАМАЛОВ Жылыой тұрғындарының алдында онлайн есеп беру барысында ауданда мектеп мұғалімінің 24 орны бос екенін айтты. Математика, информатика, орыс тілі мен әдебиетінің мұғалімдері жетіспейді. Өткен жылы №6 мектептің үш бастауыш сыныбын жабуға тура келген.
Жамаловтың айтуынша, облыстық білім беру басқармасына, Х.Досмұхамедұлы атындағы АМУ-ге, өзге де оқу орындарына бос орындар жәрмеңкесіне қатысуға хат жолданған. Дәрігерлердің жетіспеушілігі де өткір тұрған өзекті мәселеге айналған.
- Өткен жылы ауданға 13 маман дәрігер келді. Бірақ әлі де 25 дәрігер жетіспейді: 10 жалпы тәжірибелі дәрігер, екі инфекционист, екі анестезиолог-реаниматолог, гастроэнтеролог, реабилитолог, функционалды диагностика дәрігері, травматолог-ортопед, онколог, офтальмолог, фтизиатр, невропатолог, психиатр, сәулелі диагностика маманы, клиникалық фармаколог, – деп санамалап шықты әкім.
Қазіргі кезде Құлсарыда гемодиализ орталығы жұмыс жасайды. «Созылмалы бүйрек ақауы» диагнозымен 23 пациент диспансерлік есепте тұр, оның 18-і гемодиализ қабылдайды.
Бұдан басқа, туберкулездік аурухана ғимараты жанынан ашылған 40 кереуеттік инфекциялық стационар және 60 орындық провизорлық стационар жұмыс жасауда.
Х. Жамаловтың мәліметіне сәйкес, 27 наурыз – 31 желтоқсан аралығында Жылыой ауданы бойынша коронавирус инфекциясының 1 190 жағдайы тіркелген.
Ләззат ҚАРАЖАНОВА