29 желтоқсанда сағат түнгі бірде Атырау қаласының жедел полиция басқармасының инспекторлары, орталық көпірдің маңында шанада отырған адамды «сүйреп» жүрген көлікті байқайды.
Полиция департаментінің баспасөз қызметі хабарлағандай, оқиға орнына жедел полиция патрулі жіберілді. «Тентек бала» Hyundai Tucson маркалы көліктің 20 жастағы жүргізушісі болып шықты. Ол шананы көлікке тіркеп алып, 22 жастағы қызды сырғанатып жүрген.
Жүргізушіге қатысты ҚР ӘҚБтК-нің 595-бабы («Жол ережесін бұзу») бойынша әкімшілік хаттама толтырылып, 13890 теңге көлемінде айыппұл салынды.
Айнұр САПАРОВА