Қай министрліктер мен әкімдіктер бюджет қаражатын игере алмады

Орталық мемлекеттік органдар мен жергілікті атқарушы органдар жоспарланған қаражатты игеруді жеделдетуі қажет. Бұл туралы бүгін Үкімет отырысында ҚР Қаржы министрі Ерұлан Жамаубаев айтты, деп хабарлайды ҚазАқпарат.

Мемлекеттік бюджеттің шығыстары 99,5, республикалық бюджеттің шығыстары - 99,8, жергілікті бюджеттердің шығыстары – 99,5 пайызға атқарылды. Республикалық бюджеттің шығыстары 10 трлн 272 млрд теңгені құрады. 26 млрд теңге атқарылмаған. 

«Оның ішінде үнемдеу – 6 млрд теңге, игерілмегені – 20 млрд теңге. Игерілмеудің неғұрлым ірі сомасы мынадай орталық мемлекеттік органдарда қалыптасты: Мәдениет және спорт министрлігі, Бас прокуратура, Қаржы нарығын реттеу және дамыту агенттігі, Цифрлық даму, инновациялар және аэроғарыш өнеркәсібі. Игерілмеудің негізгі себептері - конкурстық рәсімдерді, шарттарды жасасу рәсімдерінің ұзақ өткізілуі, орындалған жұмыстар актілерін ұсынбау, карантиндік шектеулерге байланысты тауарларды жеткізбеу, нақты көрсетілген қызметтер көлемі, орындалған жұмыстар үшін ақы төлеу», - деді министр. 

Осыған орай Ерұлан Жамаубаев орталық мемлекеттік органдар мен жергілікті атқарушы органдар жоспарланған қаражатты ғана емес, сондай-ақ Үкімет резервінен бөлінген ақшаны да игеруді жеделдетуі қажеттігін баса айтты. 

«Яғни, бюджеттік тәртіпті күшейту қажет. Пайдаланылмаған резервтік ақшаны осы жылдың соңына дейін бюджетке қайтаруға тура келеді», - деді ол. 

Министр дерегінше, жергілікті бюджет шығыстары 5,6 трлн теңгені құрады. Атқарылмағаны - 30 млрд теңге. 

Биыл өңірлерге 2,3 трлн теңге сомасында нысаналы трансферттер көзделген. 

Алдын ала мәлімет бойынша, оларға 1 қазанға 1,5 трлн теңге бөлінді. Атқарылмағаны - 8 млрд теңге. Оның ішінде 2 млрд теңге үнемделді, 6 млрд теңге игерілмеді. 

«Ең көп игерілмеген қаржы мына өңірлерде қалыптасты: Ақтөбе, Батыс Қазақстан, Қарағанды облыстарында және Нұр-Сұлтан қаласында», - деді ол.