ҰҚК Алматы тұрғынын қылмыс үстінде ұстады

Ұлттық қауіпсіздік комитеті Алматыда синтетикалық есірткі сататын ер адамды ұстады, деп хабарлайды Sputnik Қазақстан комитеттің баспасөз қызметіне сілтеме жасап.

ҰҚК Алматы аумағында синтетикалық есірткі сататын топтың заңсыз әрекетінің жолын кесті.

Есірткі сатушы 16 сәуірде ұсталған. ҰҚК Алматы қаласының тұрғынын 300 грамм синтетикалық есірткі сатып жатқан жерінен ұстады.

Осы факт бойынша Қылмыстық кодекстің 297-бабы 3-бөлігі 1, 3-тармақшаларына сәйкес қылмыстық іс қозғалды.

"Ұсталған адам тергеу изоляторына қамалды, сотқа дейінгі тергеу жалғасуда", - делінген хабарламада.

Комитет соңғы уақытта Алматы қаласының аумағында синтетикалық есірткіні жасырын қолдан жасау және өткізу деректері көбейгенін атап өтті.

Атап айтқанда, синтетикалық есірткі айналымының 16 фактісі анықталды. Заңсыз айналымнан 9 келіден астам психотроптық зат пен 986 литр химиялық қоспа алды. Үш жасырын зертхананың қызметі тоқтатылды.

Есірткі бизнесімен айналысқан 13 адам ұсталып, қылмыстық жауапқа тартылды.

Дереккөз: Sputnik Қазақстан