Күзетші тонаушыдан қорғап қалды

Атырауда №3 емхананың (Привокзальный ықшам ауданы) қақпасы алдында әлдебір тонаушы жас қыздың сөмкесін тартып алған. Емхана күзетшісі дер кезінде оған көмекке келді. Әлеуметтік желілерге тарап кеткен бейнежазбаға сүйенсек, ашу қысқан қылмыскер сөмкені қызға бере салып, күзетшіге тап беріп, жұдырығын ала жүгіреді.

Емхана ауласындағы төбелесті сол жердегі куәгерлердің шақыртуымен келген полицейлер тоқтатып, қасқүнемді ұстады.

- Қазіргі кезде 30 жастағы күдіктіге қатысты 191-бабының 1-тармағы (Тонау, яғни бөтеннің мүлкін ашық жымқыру) бойынша сотқа дейінгі тергеу жұмыстары басталды, - деп хабарлады Атырау облыстық Полиция департаментінің баспасөз қызметі.

Осы бап бойынша жазалардың ауқымы кең – айыппұлдан бастап 4 жылға бас бостандығынан айыруға дейін жаза беріледі.

Фархат ӘБІЛОВ

Әлеуметтік желілердегі бейнежазба