Көршісін өлтіріп, 17 жылға түрмеге отырды

Атырау облыстық қылмыстық істер жөніндегі мамандандырылған ауданаралық соты кісі өлтірді деп айыпталған Атырау қаласының тұрғынына үкім шығарды.

Бұл оқиға биылғы жылдың ақпанында орын алған. Азамат Е. түнде мас күйде тонау мақсатында терезе арқылы өз көршісінің пәтеріне түседі. Қожайын әйел оянып кетіп, қылмыскерді танып қалады.

Сол кезде Е. асүйге жүгіріп, асхана пышағын алып, әйелге көптеген пышақ жарақатын салады. Әйел алған жарақаттан көз жұмады.

Қаскүнем пәтерден 150 мың теңге тұратын алтын сырға-сақиналарды алып, қылмыс орнынан бой тасалайды. Кешікпей, осыдан кейін оны полицейлер ұстайды.

Облыстық соттың баспасөз қызметі хабарлағандай, Е. кінәлі деп танылып, қатаң режимдегі колонияда 17 жылға бас бостандығынан айыру жазасына кесілді.

Мұрат СҰЛТАНҒАЛИЕВ