Лукашенко Ресеймен сауда-саттықты доллар және еуромен жүргізуді тапсырды

Беларусия президенті Александр Лукашенко өз үкіметіне Ресеймен сауда-саттықты доллар және еуромен жүргізуді тапсырды, деп хабарлайды ВВС.

 «Ресеймен сауданы рубльмен емес, біз энергия көздері үшін төлеп отырғандай, доллармен жүргізу туралы міндет қойылды», - деп мәлім етті Беларусия президенті А.Лукашенко үкіметтік жиын барысында.

Оның айтуынша, Ресеймен баяғыдан тұрақты валютада – доллар және еуромен жұмыс істеу керек еді.

БАҚ мәліметтеріне сәйкес, Беларусия Бірыңғай экономикалық кеңістік аясында Ресеймен есеп айырысу операцияларының жартысын рубльмен, қалған 40%-ын доллармен жүргізеді.

Ресей рублі соңғы уақыттары құнын жоғалтып, шамамен екі есеге құлдырап кетті. Бұл Ресей айналасындағы көршілес елдердің экономикасына да өз салқынын тигізбей қоймауда.

Дереккөз: bnews.kz