Барлық дәйексөздер

ҚР президенті Нұрсұлтан НАЗАРБАЕВ:

- Нарықтық ахуалдың, ел бюджеті жағдайының нашарлауына, сондай-ақ, біздің негізгі экспорт тауарлары бағаларының төмендеуіне байланысты қаржыны жаппай үнемдеу қажет.

(Ақордада өткен кеңесте айтылды)

Алматы қаласындағы Кәсіпкерлер палатасы директорының орынбасары Қайрат ҚҰДАЙБЕРГЕН:

- Біздің өндірушілерге, тағы да айтамын, өзінің бәсекеге қабілеттілігін сақтау үшін өте көп еңбек ету қажет болады. Мен тіпті мұндай нәрселерге комментарий беруден қорқамын, өйткені оның қалай болатынын болашақта ғана көреміз.

(ҚР-ның ДСҰ-ға кіруіне қатысты айтылған)

Өңірлік кәсіпкерлер палатасының директоры Асылбек ЖӘКИЕВ:

- Мұнай бағасы мен Ресей рублі курсының құлдырауына байланысты қазір отандық бизнес үшін жақсы уақыт емес. Сондықтан да коммуналдық қызметтер тарифін, атап айтқанда, су бағасын өсіру кәсіпкерлеріміз үшін қосымша жүктеме болғалы отыр. Бұл мұнымен шектелмей, бизнес қызметтері бағасының қымбаттауына әкеліп соғады

(Облыстық мәслихатта өткен «Нұр Отан» депутаттық фракциясының отырысында айтылған)

ҚР президенті Нұрсұлтан НАЗАРБАЕВ:

- Сонымен қатар, нысандардың құрылысына шамадан тыс баға қойылып отыр, өз кезегінде бұл қаражат жымқыруға алып келді. Біздің елдің экспорттық тауарларының арзандауының негізінде бюджет қажетті қаражатты жеткілікті түрде алып отырған жоқ. Осыған байланысты ЭКСПО көрмесіне де, Универсиадаға да қатаң экономиканы қолдануға тура келеді.

(Халықаралық көрмеге дайындық барысы жөніндегі кеңесте айтылған)

Президент Нұрсұлтан НАЗАРБАЕВ:

- Ли Куан Ю (Сингапурдың негізін қалаушы) өзінің досын отырғызғанын айтқан еді. Ал неге менің үш немеремнің әкесін отырғызғанымды естен шығарады? Олар менің алдыма көздері жасқа тола өз аналарымен бірге келмеді деп ойлайсыздар ма? Келді. Мені уайымдамады деп ойлайсыздар ма? Әрине, уайымдадым.

(«Назарбаевпен басты мәселелер хақында» деректі фильмінде айтылған)

Италия Республикасының премьер-министрі Маттео РЕНЦИ:

- Енді біздің Қазақстанмен қарым-қатынасымыз бұдан да тығыз бола түсті.

(Миланда өткен EXPO-2015 кезінде Н.Назарбаевпен бірге лифтіде тұрып қалуына орай айтылған әзілі).

«Нұр Отан» партиясы төрағасының бірінші орынбасары Бауыржан БӘЙБЕК:

- Егер адамға тәнін емдеу қажет болса, ол дәрігерлерге барады, егер жанын емдеу керек болса, ол «Нұр Отан» партиясына келеді.

(17 маусым күні Медицина қызметкерлері күнінің қарсаңында айтылған)

Орталық Азия Психоанализ институтының директоры, танымал психоаналитик Анна ҚҰДИЯРОВА:

– Суицид теледидарлар, газеттер, журналдар болмаған кезде де болған. Өмірде, отбасында бақытты адам қандай мақала немесе фильм көрсе де, өзіне ешқашан қол жұмсамайды. Жасөспірімдер арасындағы суицидтің себебі – отбасында тыныштықтың және ата-ана мен баланың арасында түсіністіктің жоқтығынан. Ата-ананың жылуын сезінбеген бала «бұл өмірде мені түсінетін жан жоқ, мені ешкім жақсы көрмейді, бұлай өмір сүргенше өлгенім дұрыс» деген ойға келеді.

(«АЖ»-ға берген сұхбатында айтылған)

Еуропа қайта құру және даму банкінің президенті Сума ЧАКРАБАРТИ:

- Мен Сіздің атаңыздың ауылда диірмені болғанын білемін. Сіз өзіңіз де аграрлы кешеннің не нәрсе екенін жақсы білесіз. Маған Қазақстанның ұнайтын себептерінің бірі – қонақжайлылығы мен өте дәмді тағамы... Біз Қазақстанның ауыл шаруашылығына қатысу үлесін көбейтетін боламыз.

(Н.Назарбаевқа Шетел инвесторларының кеңесінде айтылған)

Атырау облысының әкімі Бақтықожа ІЗМҰХАМБЕТОВ:

- 2010 жылы осы меншік иелері Жайық жағалауына қоршау салып, резиденцияны жұрттың бәрі кіре алатын орынжайға айналдырған. Мен бұл адамдармен жеке сөйлестім және олар нысанды мемлекет меншігіне тегін қайтарды... Алғашқы уақытта біз қалалықтар үшін жағалауды ашқанбыз, алайда резиденцияның маңына үнемі қоқыс тастап, спирттік ішімдіктер ішіп, шулады. Бізге бұл идеямыздан бас тартуға тура келді. Осы жерге тәулік бойы полиция бекетін ұстап тұра алмаймын ғой!

(Әлеуметтік желілердегі «Қолжетімді жағалау» науқанына қатысты «АЖ»-ға берген сұхбатында айтылған)

Қызылорда облысының әкімі Қырымбек КӨШЕРБАЕВ:

- Мектеп оқушы есінде ақша жинау орны емес, болашаққа жолдама беретін білім ордасы ретінде сақталуы қажет. Соңғы қоңырау бәсекеге толы сән жәрмеңкесі мен қауіп қатерге толы автокөлік жарыстарына, беймезгіл уақыттағы құқықбұзушылық ошағына айналмауы керек. Әрбір оқушы ата-анасының байлығымен, лауазымымен емес, өзінің білімімен, талабымен, болашаққа талпынысымен мақтанатын болсын.

(Әкімдік отырысында айтылған)

Мәжіліс Парламентінің депутаты Азат ПЕРУАШЕВ:

- Біз жоғары лауазымды мемлекеттік шенеуніктердің офшорлық есепшоттарына қатысты банкілік құпия қағидасы қолданылмауы тиіс деп есептейміз, өйткені оларға қомақты бюджет қаржысын жұмсау сеніп тапсырылған.

(Парламенттің пленарлық отырысында айтылған)

ҚР Президенті Нұрсұлтан НАЗАРБАЕВ:

- Барлық елдер секілді Қазақстан да Ұлы Жеңіске зор үлес қосты. Сол кезеңдегі халқымыздың 20 пайызға жуығы, яғни, бір жарым миллион адам майданға аттанды, соның жартысы ғана оралды. 500 адам Кеңес Одағының батыры атағына ие болды.

(Мәскеуде өткен ТМД мемлекет басшыларының кездесуінде айтылды)

Атырау облысының әкімі Бақтықожа ІЗМҰХАМБЕТОВ:

- Бір мысал келтірейін. 2003 жылы энергетика және минералды ресурстар министрінің орынбасары болып тұрған кезде мен еліміздің оңтүстік өңірлерін батыс Қазақстанның газымен қамтамасыз ететін «Бейнеу-Базой-Шалқар-Самсоновка» газ құбырын салу жобасын ұсындым. Қазір газ құбыры салынуда. Қызылорда, Оңтүстік Қазақстан, Жамбыл және Алматы облыстарының тұрғындары кешікпей өздерінің қазақстандық газімен қамтылатын болады.

(Облыстық мәслихаттың сессиясында өзінің өңірдегі жобаларына қатысты айтқаны)

ҚР ұлттық экономика министрінің орынбасары Тимур ЖАҚСЫЛЫҚОВ:

- Қазақстан Еуразиялық экономикалық одақ шеңберінде бірыңғай және ұлтүстілік (наднациональный) валютаны енгізу мүмкіндігін жоққа шығару бойынша айқын да жүйелі ұстанымға ие. Бұл тақырыпты біз талқыламаймыз.

(Астанада өткен брифингте айтылған)

ҚР Парламенті Мәжілісінің депутаты Мұхтар ТІНІКЕЕВ:

- Бұл ақшалар қайда кетті? Әрбір банкте өз сақтандыру компаниялары болды, міне сол ақшаларды олар осы сақтандыру істеріне пайдаланған. Несиелер төлеген, сол ақшалардан шапкалар алған, Енді келіп «Білмейміз» дейміз. Ендеше сол банкирдерді отырғызыңдар.

(Қазақстандықтардың 90 миллиард теңге зейнетақы жинақтарының жоғалып кетуіне қатысты айтылған)

Ресейдегі энергетикалық саясат Институтының директоры Владимир МИЛОВ:

- Бізде бұл идеяны Ресейде алюминий магнаты Олег Дерипаска секілді олигархтар баяғыдан көтеріп жүр. Ол әлдеқашан қаржы саясатын жеңілдетуге және бизнеске жаппай арзан ақшаны таратуға қол жеткізу мақсатымен ресейлік Центробанкке бұқаралық қысым көрсетудің насихатшысына айналған... Шикізаттық экономиканың күрделі жағдайда құлдыруы кезінде ірі бизнеске арзан ақшаны тарату сіздерді 90-шы жылдардың басындағы Ресейге алып келеді. Бұл туралы ұмытпаңыздар.

(LS қазақстандық журналда Тимур Құлыбаевтың ҚР Ұлттық банкке қатысты шағымына байланысты айтылған)

Қырғызстан Республикасының президенті Алмазбек АТАМБАЕВ:

- Бәлкім, (...) бес жыл бойына 2010 жылдың 7 сәуірінде орын алған оқиғаны ұялмай қаралап келгендерді және қашқын президенттің (Құрманбек Бәкиевтің) отбасына әлі күнге дейін қызмет етіп жүргендерді люстрациялап, елден қуу керек пе еді.

(Бірнеше мыңдаған оппозиция жақтаушылары Бішкектегі Үкімет үйін басып алған 2010 жылғы оқиғаны еске алуға қатысты өткен жиында айтылды)

Облыстық жұмыс берушілер мен кәсіпкерлер одағының жетекшісі Әлия БЕКҚОЖИЕВА

– Жерді бизнес үшін кез келген адам ала бермейді. Әкімдікпен байланысы барлар бірнеше телімнен алып, оларды оңды-солды сатқан болып тұр ғой. Біз мұның қалай жасалатынын жақсы білеміз.

(ҰКП Атырау филиалының отырысында айтылған)

ҚР вице-премьері Бердібек САПАРБАЕВ:

- Қазақстандық немесе шетелдік кәсіпорындар болсын, бәрі де Қазақстан заңын сақтауы тиіс. Басқаларға сабақ болу үшін оларға қатал болуымыз керек!

(Атырауға сапарында «Ерсай Каспиан Контрактор» компаниясының персоналдарға ағылшын тілінде тестілеу жүргізуді мәлімдегеніне қатысты айтылған)

ҚР президенті Нұрсұлтан НАЗАРБАЕВ:

- Өздеріңіз ешнәрсені жасырып қалуға болмайтынын көріп отырсыздар. Демек барлығын да анықтауға болады.

(«Нұр Отан» партиясының XVI съезінде мүлікті заңдастыруға қатысты айтылған)

ҚР президенті Нұрсұлтан НАЗАРБАЕВ:

- Әдемі мемлекет– Сингапурдың негізін қалаған басшы кетіп қалғанда, мен: “Сіз неге кетіп қалдыңыз? ”, деп сұрадым. “Енді мен 31 жыл басқардым ғой. Әрі өзімді теледидардан көргенде, өзіме өзім ұнамайтынмын”,  - деді ол. Мен оған: “Теледидар бұрмалап көрсететін болар”, дедім. Менің де жоспарларым сондай. Бірақ қазір халықты бірлестіруге деген зор ұмтылыс, ықылас бар. Бүгін Сіздермен әрі қарай мен не істеуім керек деп ақылдасуыма мүмкіндік болып отыр.

(6 наурызда Қазақстан әйелдер қауымы өкілдерімен «Көктем шуағы» атты кездесуде айтылған)

ҚР парламенті сенатының депутаты Жабал ЕРҒАЛИЕВ:

- Өз балаларына екпе салдырудан бас тартқан ата-аналарды, меніңше...  жазалау мәселесін тереңірек қарастыру керек...

(Әлеуметтік-мәдени даму комитетінің кеңейтілген отырысында айтылған)

ҚР Жоғарғы сотының төрағасы Қайрат МӘМИ:

- Атырау облыстық сотында төменгі сатыдағы соттардың шешімдері жиі және себепсіз бұзылып, өзгерістерге ұшырайды... Шағымдардың 82 пайызы экономикалық сотқа түседі. Қандай себеппен? Сіздер қайда қарап отырсыздар? Үнемі бұрмалауға жол бересіздер. Сіздер өз міндеттеріңізді атқара алмай отырсыздар не жұмыс істегілеріңіз келмейді!

(Атырау облыстық сотының жаңа төрағасын тағайындау кезінде айтылды)

ҚР Нұрсұлтан НАЗАРБАЕВ:

- Команданы жинаймыз дейді. Кейін команда бандаға айналады, Атырау облысындағыдай.

(Ақ Ордада өткен кеңесте айтылған)

ҚР энергетика министрі Владимир ШКОЛЬНИК:

- 2013 жылы орын алған техникалық келеңсіздіктерді түзеу бойынша жұмыстарды 2016 жылғы желтоқсанда бітіруді жоспарлап отырмыз. Содан кейін Қашағанда коммерциялық мұнай өндіру басталады.

(Атырауға сапары барысында айтылған)

ҚР премьер-министрінің бірінші орынбасары Бақытжан САҒЫНТАЕВ:

- Кедендік одақ пен Еуразиялық экономикалық одақ Елбасының төлбаласы іспетті, сондықтан біз одан ешқашан шықпаймыз. Егер бір жағдай бола қалса да, одақтың құрамынан соңғы болып шығатын біз боламыз.

(Алматыдағы кәсіпкерлермен кездесуде айтылды)

Атырау қаласындағы №7 емхананың бас дәрігері Ғазиз ЕСҚАЛИ:

- Тегін дәрі-дәрмекке қаржыны көршілес Оралда бізден үш есе көбірек бөледі. Біздер мұнайлы астана бола тұрып осындай мәселелерді шеше алмаймыз. Мен осыған таңғаламын. Біздің мәслихатта отырған депутаттарымыз не бітіріп отыр?

(Медицина мәселесі сөз болған «дөңгелек» үстелде айтылған)

Владыка Антоний, Орал қ.:

- Шоқыну – бұл денсаулық, бейбітшілік, келісім, махаббат, заңдардың орындалуы мен президентке бағыну мерекесі. Құдайға және президентке!

(Шоқыну мерекесін тойлау кезінде айтылған, «Мой город» сайты)

ҚР ІІМ әкімшілік полиция комитетінің төрағасы Игорь ЛЕПЕХА:

- ...егер бала ірі болса, бойы 135 сантиметр, салмағы 36 келі болса, онда ол талапқа  (балалардың 12 жасқа дейінгі санаты туралы ЖҚЕ талаптарына) кірмейді, өзіңізбен бірге туу туралы куәлікті алып жүрудің қажеті жоқ. Біз бойы 135 және одан жоғары, тіпті 134 сантиметр болатын баланы көзбен шолып көрдік – ондай жағдайда ешкім ешқандай талап қоймайды.

(Орталық коммуникациялар қызметінің брифингінде айтылған)

ҚР энергетика бірінші вице-министрі Ұзақбай ҚАРАБАЛИН:

- 2014 жылдың 13 желтоқсанында басқа мәселелермен қатар «бастапқы» құбырға байланысты барлық мәселелер реттелген ҚР мен Солтүстік-Каспий жобасының Мердігер компаниялары арасындағы реттеу туралы келісімге қол қойылғаны жөнінде хабарлаймыз. ...Республика осыған байланысты ешқандай шығынға ұшырамайды деген келісімге келді.

(«АЖ»-ның жазбаша сауалына берген жауабынан)

Тәуелсіз сарапшы Петр СВОИК:

- Бұл бірлестік 1 қаңтардан бастап толық қуатты жұмыс істейді деп ойлау – адасушылық. Оның іске қосылғандығы жөнінде жарияланады, ол жұмыс істейтін болады, бірақ әрбір келесі жылдың 1 қаңтарында ЕАЭО жалпы ережелер мен заңдар және оларды орындайтын жалпы органдардың жоқтығына тоқтала бермек.

(«Время» газетіне берген сұхбатынан)

ҚР президенті Нұрсұлтан НАЗАРБАЕВ:

- Менің стилисім де, костюмерім де жоқ. ...Мен өзім қара күрек, шойын сүймен ұстаған металлургпын. Мені тәрбиелеген осы. Барлығын өзім жасаймын.

(Ақордада жас журналистермен өткен кездесуде айтылды) 

ҚР премьер-министрі Кәрім МӘСІМОВ:

- ҚХР Қазақстан үкіметіне шикізаттық емес сектор қуаттылығын Қазақстан аумағына көшіру жобасын ұсынды. Әңгіме бірнеше миллиардтық келісімшарттың шикізаттық емес секторға қатысы бар ондаған кәсіпорындар жайында болып отыр. Біз бұл ұсынысты ризашылықпен қабыл алдық.

(Астанада өткен ШЫҰ-ның үкіметтері басшыларының отырысынан кейін айтылды)

Шешенстан Республикасының президенті Рамзан ҚАДЫРОВ:

– Егер содыр Шешенстанда полиция қызметкерін немесе басқа адамды өлтірсе, оның отбасы жедел түрде Шешенстаннан қайтып оралу құқығынсыз шығарылады да, үйі іргетасымен бірге сүріледі... Мен бұл жерде ешкімге қан төгуге жол бермеймін!

(Грозныйда 14 полицей мен 11 содыр қаза болғаннан кейін айтылды)