Теңіз жаяу әскерін Атырауда әуенмен қарсы алды

30 сәуірде Атырау қаласының теміржол вокзалында Ақтау қаласындағы теңіз жаяу әскері бригадасында мерзімді әскери қызметін аяқтаған сарбаздарды қарсы алды.

Әскери қызметшілердің салтанатты кездесуі Атырау қаласының теміржол вокзалында өтті. Перрон қарсы алушыларға, әскери киімдегі адамдарға, қуанышты эмоцияларға және әскери музыкаға толы болды. Осыған орай Атырау қаласы Ұлттық ұланының әскери бөлімінің басшылығы кездесу үшін әскери үрмелі оркестр жіберді, оның дыбысы іс-шараға ерекше салтанат сыйлады.

- Бүгін Ақтау қаласынан теңіз жаяу әскері бригадасынан 20-дан астам сарбаз келді. Ата-аналар балаларын шармен, қуанышты күлкімен және әскери оркестрдің үнімен қарсы алды. Осындай құрметпен Атырау облысында қызмет еткен барлық жауынгерлерді әрдайым қарсы алады, - деп түсіндірді Атырау облысы Қорғаныс істері департаменті бастығының орынбасары полковник Қуандық БЕРДІҒАЛИЕВ.

Қарсы алу үшін вокзалға Атырау облысы мен Атырау қаласының әскери басқару органдарының өкілдері, ардагерлер ұйымдарының басшылары келді.

- Осы жолдан өткеннен кейін мен отбасын ғана емес, уақытымды, адалдығымды және шынайы достығымды да бағалай бастадым. Қызмет еткен жылы адал жауынгерлерді таптым және өз Отанымның нағыз қорғаушысы болдым. Мен дәл осы бригадада болғаныма қуаныштымын, өйткені әркімге өзін теңіз жаяу әскері деп атау мәртебесі берілмейді, − деп бөлісті кіші сержант Әли Амангелді.

Мерзімді қызметте бір жыл ішінде сарбаздар көптеген оқу тапсырмасын орындады, дабыл қағып, шеруге шықты. Күн сайын жігіттер рухын күшейтіп қана қоймай, денені де шыңдады. Шыңдалғаннан бөлек балалар ҰБТ-ны есептемей елдің жоғары оқу орындарына түсуге мүмкіндік алды, ал қызметте үздік нәтиже көрсеткендерге тегін жоғары білім алуға мүмкіндік берілді.

Нұрбейбіт НҰҒЫМАНОВ

ҚР ҚМ Атырау гарнизонының баспасөз қызметі жолдаған суреттер