«Көптоғай синдромы»: расында депутаттар халықтың мүддесін қорғай ма?

Жақында салынып, қайта алынған ҚР мен РФ арасындағы шекара қоршауы Құрманғазы ауданының Көптоғай ауылы тұрғындарының жаппай наразылығын тудырды. Ал біздің өңірден сайланған Мәжіліс депутаттары бұл мәселе бойынша не ойлайтынын «АЖ» олардың өзінен сұрап көрді.

Серік ЕРУБАЕВТЫҢ айтуынша, олар қазір әріптестері Дүйсенбай Тұрғанов және Сәлімжан Нақпаевпен бірге бұл мәселені қарастыруда.

- Біз қазір бұл жағдайға қалай әсер ете алатынымызды ойластырып жатырмыз. Мен жағдайды түсіндіру үшін тиісті органдарға сауал жіберуді ойлап отырмын. Жергілікті тұрғындар бұл суды көп жыл бойы мал суаруға пайдаланып келді, сондықтан оларға су өте қажет, - дейді Ерубаев.

Естеріңізге сала кетсек, әңгіме Қиғаш өзенінен ағатын және Көптоғай ауылының маңында орналасқан Отыз бес көлі туралы болып отыр, жергілікті тұрғындар бұл суды өздеріне және мал суару үшін пайдаланады.

Тағы бір айта кетерлігі, 2005 жылдың 18 қаңтарында Мәскеуде Қазақстан-Ресей мемлекеттік шекарасы туралы келісімге қол қойылды, екі ел арасында шекара белдеуі орнатылды, бірақ демаркациялық жұмыстар жүргізілген жоқ. Жаңа қоршаудың құрылысын ҚР ҰҚК Шекара қызметінің 2016 әскери бөлімі жүргізді.

Парламент Мәжілісінің тағы бір депутаты Дүйсенбай ТҰРҒАНОВТЫҢ пікірінше, демаркациялық жұмыстар заң бойынша қол қойылған мемлекетаралық келісімге сәйкес жүргізілуде:

- Ал шекара дәл қай жерден өтетінін жергілікті атқарушы органда нақтылау қажет. Келісім әлдеқашан қабылданған, демаркация жөніндегі комиссия құрылды, оның құрамында жергілікті атқарушы органдар да бар. Неліктен олар қазір шетте қалды? Бұл Қиғаш емес, көл ғой. Ол ертең кеуіп қалады деп жатыр. Өкінішке орай, мен бұл туралы көп білмеймін.

Ал Парламент Мәжілісінің депутаты Сәлімжан НАҚПАЕВТЫҢ айтуынша, демаркациялық жұмыстар келісімге қол қойылғаннан кейін бірден жүргізілуі тиіс.

- Кеше мен Атырау облысы әкімінің бірінші орынбасары Серік Айдарбековке қоңырау шалдым – ол алаңдауға негіз жоқ екенін және бәрі заңды жүріп жатқанын айтты. Барлығы заңды болу керек. Туған жердің бір шаршы метрі де шетелге өтпеуі тиіс. Менің ойымша, Үкімет бұған жол бермейді, нақтылаймыз, осы мәселемен айналысамыз. Қазір әріптестерімнің бірі шекара қызметіне сауал жолдады, бәрін анықтағаннан кейін егжей-тегжейлі жауап береміз, - деді Нақпаев.

Естеріңізге сала кетсек, кеше кешке ҰҚК Шекара қызметі Көптоғай ауылындағы шекарадағы қоршауларға қатысты жағдай бойынша түсінік берді. 

Айнұр САПАРОВА