Тергеуге келмеген Атамбаевқа ішкі істер вице-министрі барды

Қырғызстан ішкі істер министрінің орынбасары Мирлан Каниметов айқындалмаған қылмыстық іс аясында үш мәрте тергеуге шақыруды елең қылмаған бұрынғы президент Алмазбек Атамбаевтың резиденциясына барды.

Атамбаевтың көмекшісі Кундуз Жолдубаева Азаттыққа Мирлан Каниметов пен ішкі істер министрлігінің бірнеше өкілі 22 шілде күні бұрынғы президенттің Кой-таш ауылындағы резиденциясына келіп-кеткенін айтты.

Жолдубаеваның сөзінше, Атамбаев Каниметовпен сөйлесуге шықпай қойған, оның орнына көмекшісі шығып сөйлескен.

- Адвокатымыз бұған дейін жариялаған позициямызды қайталап айттым. Министрлікке де хабарлағанбыз. 27 маусым күнгі Алмазбек Атамбаевты президенттік тиіспеушілік хақынан айыруға дауыс берген парламент шешімін заңсыз деп санаймыз, - деді Жолдубаева.

Оның сөзінше, Каниметов көмекшінің мәлімдемесін түсінгенін айтып, резиденциядан кетіп қалған.

22 шілде күні іле-шала Атамбаев аты-жөні аталмаған адамдардың шақыруымен 24 шілдеде Ресейге екі күнге бара жатқанын мәлімдеді. 

Өткен аптада Атамбаев үшінші мәрте ішкі істер министрлігінің тергеуге шақыруын елемей қойған. Осыдан кейін оған тергеу амалдары үшін қамалу қаупі төнген.

Дереккөз: azattyq.org