Аялдамадағы апат

19 маусым күні кешкі сағат тоғызға жақын Атырауда «Тойота» көлігі қатты жылдамдықпен Азаттық даңғылы бойындағы «Шипажай» автобус аялдамасына соғылды. Нәтижесінде 6 адам түрлі жарақат алды.

- «Жедел жәрдемге» сағат 20.26-да қоңырау түсті. Бас сүйек-ми жарақаты, жамбастың ашық сынық жарақаты және іш қуысының жабық жарақатымен екі зардап шегуші облыстық ауруханаға жатқызылды, әртүрлі дене жарақаттарымен төрт адам травмпунктке жеткізілді, - деп хабарлады облыстық денсаулық сақтау басқармасынан.

- Оқиға орнында бір зардап шегуші қаза болды деген ақпарат шындыққа жанаспайды, - дейді облыстық ІІД баспасөз хатшысы Назымгүл ҚАЙСАҒАЛИЕВА. -  20 маусымдағы ақпарат бойынша, ауруханада екі адам қалды, қалғандары медициналық жәрдем көрсетілгеннен кейін үйлеріне жіберілді. Жол-көлік оқиғасына қатысты тергеу амалдары жүріп жатыр.

«АЖ» бейресми ақпараты бойынша, «Тойота» жүргізушісі 19 жаста.

Фархат ӘБІЛОВ

Суреттер мен бейнежазбаны куәгерлер жолдады