Құтқарушылар орға түскен сиырды шығарды

8 қыркүйек күні қала маңындағы Балауса поселкесінде құрылысы жүріп жатқан үйдің иелері шығып кетіп, қайта келгенде тереңдігі 2 метр болатын септикке сиыр түсіп кеткенін көреді. Олар Батыс құтқару отрядына хабарласады.

- Біз айтылған жерге келгенде үй иелерінің айтуынша, сиыр шұңқырда 6 сағаттай тұрған. Құтқару жұмыстарына өрт сөндіретін апаттық-құтқару автокөлігі қатысты, - дейді бөлімше командирі Александр КАЧАЛОВ. 

Қызметкерлердің бірі етік киіп шұңқырға түсіп, арқан кигізіп, содан соң жануарды кранның көмегімен жоғары тартып шығарды. Сиыр өзінің алғысын білдіргісі келді ме екен, мөңіреді де далаға қарай кетті.

Мұрат СҰЛТАНҒАЛИЕВ

Суретті түсірген Александр КАЧАЛОВ