Бас прокуратура: Тоқмадидің үйінен қару-жарақ табылды

Қазақстан бас прокуратурасының хабарлауынша, ауыр және аса ауыр қылмыс жасады деген күдікке ілінген Мұратхан Тоқмадиге қатысты соталды тергеу жүргізіп жатыр.

"Күдіктінің үйін тінту кезінде қаржы құжаттары, криминалдық қару, оқ-дәрі, жалған құжат және өзге де заттай айғақтар табылды. Азаматтардың арызы мен өтініші бойынша қосымша тергеу жүріп жатыр", - деп хабарлады бас прокуратураның баспасөз қызметі.

Мұратхан Тоқмади 12 маусым күні таңертең Қылмыстық кодекстің 194-бабы 3-бөлімінің 2-тармағы бойынша ("ірі көлемдегі мүлікті иелену мақсатымен бопсалау") күдікті ретінде ұсталған. Алмалы аудандық соты Тоқмадиді екі ай мерзімге қамауға санкция шығарған.

Ресми мәлімет бойынша, Тоқмади "2005 жылы аты-жөні анықталмаған адамдармен сөз байласып, "Семрюжком" фирмасы мен "КазСтройСтекло" құрылтайшысына күш көрсету арқылы бопса жасап, аталған кәсіпорындардағы жарғылық капиталының үлесін иеленген".

Полиция 12 маусымда "КазСтройСтекло" зауытын тінтіген. Зауыт бас директорының орынбасары Людмила Шепелева сол кезде Азаттыққа зауыт аумағында тінту жүргізіліп, компьютерлер мен құжаттар тәркіленгенін хабарлаған. Тоқмадидің жақындары оны кінәсіз деп санайды.

Дереккөз: Азаттық