Индерден бруцеллез шықты

Индер ауданында сегіз ірі қарадан және 57 қой-ешкіден бруцеллез ауруы анықталды. Ауру алдын алу шаралары аясында малдан қан алу кезінде шығып отыр.  

Соның ішінде ауру Елтай ауылында көптеп кездесіп отыр. Индербор поселкесінен үш қой-ешкіден және бір ірі қарадан, Елтай ауылынан 31 бас қой-ешкіден және жеті ірі қарадан, Есбол ауылынан 23 қой-ешкіден бруцеллез шығып отыр. Одан бөлек, үш адам ауру жұқтырды деген күдіктілердің қатарына еніп отыр. 

Бүгінде аудан бойынша 6 955 ірі қара мен 23 277 қой-ешкіден қан сынамасы алынған. Алда әлі 18 967 ірі қара мен 128 523 қой-ешкі тексерістен өтуі тиіс.

- Ауру малдар тез арада оқшауланып, ірі қаралар мал сою пунктінде сойылды. Етін мал иесі өзі алып кете алады. Ал егер алмайтын болса, оны Атырау қаласындағы «Асыл-Агро» ЖШС-іне қайта өңдеуге жібереді, - дейді аудандық ветеринария бөлімінің басшысы Сатыбалды ОРАЗҒАЛИЕВ. -  Биыл көзі жойылған мал үшін өтемақы төлеу ережесінде өзгеріс бар. Енді әрбір басқа төленетін ақының 30 пайызы бюджеттен, ал 70 пайызын «Асыл-Агро» ЖШС төлейді.

Өткен жылы ауданда үш ірі қара мен 158 қой-ешкіден бруцеллез анықталған болатын.

Ләззат ҚАРАЖАНОВА