Қала шетінде ұрлықты кәсіп еткен

ҚІІБ криминалдық полиция қызметкерлері өткен жылдың наурызынан бастап жеке үйлерді тонаумен айналысқан 22-24 жастағы үш Атырау тұрғынын ұстады.

Қылмыскерлер қожайындар жоқ кезде пластик терезе арқылы үйге кірген. Орталықтан шалғайдағы Самал, Жерұйық, Балауса, Жұлдыз, Нұрсая, Лесхоз, Сарықамыс ықшамаудандарында тонаумен айналысқан.

Топты ұстау кезінде заттай айғақтар – фотоаппарат пен ноутбук алынды. ІІД баспасөз қызметінің жетекшісі Гүлнәзира МҰХТАРОВАНЫҢ айтуынша, ұрланған зергерлік бұйымдарды ұрылар ломбардқа тапсырып, қолма-қол ақшаларды жұмсап жіберген.

ҚР ҚК-нің 188-бабы («Ұрлық») бойынша қылмыстық іс қозғалды. Ұсталушылардың басқа қылмыстарға қатыстылығы тексерілуде.

Мұрат СҰЛТАНҒАЛИЕВ