​Майор біреудің КамАЗ-ын сатып жіберген

Құрманғазы аудандық соты ҚР ҚК-нің 361-бабы 2-тармағымен («Лауазымдық өкiлеттiктерді теріс пайдалану») айыпталған жергілікті ішкі істер бөлімінің бұрынғы бастығына қатысты қылмыстық істі қарады.

Айыптау тарапының жорамалына сәйкес, өткен жылдың күзінде полиция майоры Котяев ауылының тұсында ақауына байланысты тұрып қалған Тәжікстан Республикасы азаматының меншігіндегі «КамАЗ» автокөлігінің тұрғанын және оның иесінің республика аумағында жоқ екенін білген. Осыдан соң ол автокөлікті жөндеп, аудандық ІІБ-іне айдап әкелуді бұйырады. Кейін оны өзінің танысына 600 000 теңгеге сатып жібереді.

Сотта оның кінәсі толық дәлелденіп, оған мемлекеттік қызмет саласындағы лауазымдарды атқару құқығынан өмір бойына айыра отырып, 4 млн 242 мың теңге айыппұл салу жазасы тағайындалды. Жаза тағайындау кезінде оның өз кінәсін мойындап, келтірілген залалдың орнын өз еркімен толтыруы және кәмелетке толмаған балаларының болуы ескерілген. Сот үкімі заңды күшіне енді.

Ләззат ҚАРАЖАНОВА