​Бруцеллез Индерден де шықты

Индер ауданында бруцеллез жұқтыру оқиғасы тіркелді.

Қазір ауданда жұқпалы дертке байланысты малдар мен сырқаттанған адамдардан жаппай қан алу жүріп жатыр. Зертханалық тексерістің нәтижесінде бүгінде Есбол мен Елтай ауылдарынан 11 қой-ешкі мен бір адамнан бруцеллезге оң әсер берушілік анықталып отыр. Салыстыру үшін келтіріп өтсек, былтыр бұл індетті 11 ірі қара, 143 қой-ешкі мен 12 адам жұқтырған болатын.

- Қазір Елтайдан тіркелген науқас адам ем алып жатыр, ал, малдарды Атыраудағы «АсылАгро» ЖШС-нің шұжық дайындау цехына жіберіп жатырмыз, - деп хабарлады Индер аудандық ветеринария және ветеринариялық бақылау бөлімінің басшысы Сатыбалды ОРАЗҒАЛИЕВ. – Еске салып өтейін, бруцеллезге ұшыраған ірі қара малдың етін 100 градуста қайнатып жей беруге болады.

Аудан бойынша жалпы 18 мыңдай ірі қара, 2 900 түйе, 89 мыңға жуық қой-ешкі тексерістен өтуі қажет.

Ләззат ҚАРАЖАНОВА