6 ақпанда сағат таңғы 5.30-да жергілікті "Батыс-41" полицей қызметінің экипажы Орал және Астрахань тас жолының қиылысында туберкулезге қарсы күрес ауруханасы жақтан қала орталығына қарай кетіп бара жатқан "Фольксваген-Гольф" көлігін тоқтатты. Салонда полицейлер түрлі азық-түлік - жұмыртқа, тоспа, құс аяғы және т.б. салынған жәшіктер бар екенін анықтады.
Бірер минуттан кейін "102" пультіне Сарыөзек ауданы маңындағы азық-түлік сататын дүкеннің қожайынынан қаскөйлердің пластик терезесін сындырып, ішке кіріп, азық-түліктерді қолды еткені туралы қоңырау түсті. Ұрланған азық-түліктер ұсталған көлік ішіндегі заттарға сай келді. Атырау қаласының 38 және 43 жастағы екі тұрғыны ұсталды. Зардап шегуші ұрланған азық-түліктерді таныды. ҚР ҚК-нің 188-бабы (ұрлық) бойынша қылмыстық іс қозғалды. Ұсталушылардың осындай қылмыстарға қатыстылығы тексерілуде.
Мұрат СҰЛТАНҒАЛИЕВ
Бейнежазбаны Атырау қ. ІІБ ұсынды