​Жеке мекемелер және мемлекеттік тапсырыс

Бүгінде Атырау облысында 36 жеке медициналық мекеме жұмыс істейді, олардың үштен бірі мемлекеттік тапсырысқа қатысады.

Бұл туралы өңірлік коммуникациялар қызметінде өткен брифингте облыстық денсаулық сақтау басқармасының басшысы Аманбек ЖҰМЫРОВ хабарлады.

2011 жылы мемлекеттік-жеке серіктестік бағдарламасы бойынша 27 медицина мекемесі шаруашылық жүргізу құқығына ауысты. 2013 жылы оларға облыстық аурухана, облыстық перинаталды орталық және облыстық кардиоорталық қосылды.

2015 жылдың аяғында аукцион арқылы облыстық салауатты өмір салтын қалыптастыру орталығы жеке қолға сатылып кетті. Ал, қазір күніне 250 адам келетін Өркен ықшамауданындағы емхана құрылысына қатысты «Атырау Инновейшн» ЖШС-мен бірге концессиялық қосымшаны әзірлеу жұмыстары жүргізілуде.

– Міндетті медициналық сақтандыруды енгізу жеке медициналық мекемелердің, ал, ақыр аяғында медициналық қызмет көрсететін басқа мекемелердің жұмысын жандандырады, - дейді сеніммен Жұмыров.

Зульфия ИСКАЛИЕВА