Сәуірдің 18-нде күндіз «Күзет» мемлекеттік күзет қызметінің қызметкері Говоров көшесінің бойындағы кәсіпорындардың бірінің өткізу ауласында жұмысынан гайкалы 20 болтты алып кетуге тырысқан 52 жастағы қызметкерді ұстады.
***
Сәуірдің 19-нда жол-патруль қызметінің қызметкерлері Атырау-Аққыстау тас жолында «Лада-Приора» көлігін тоқтатқан. 33 жастағы жолаушыдан - Исатай ауданының тұрғынынан 21 келі жас бекіре балығының еті табылды.
***
Атыраудағы сауда үйлерінің бірінде ұялы телефон жөндейтін пункт қызметкері кепілдік ретінде клиенттің 12 мың теңгесін алып, ғайып болған. Іздеу жарияланды.
***
Сәуірдің 20-нда кешкісін ұйымдасқан қылмыспен күрес басқармасы мен жол-патрульдік қызмет қызметкерлері Майлин көшесінің бойында «Дэу-Нэксия» көлігін ұстады. Оның жүксалғышында 143 келі қызыл балық болған. Балық жолаушыға, Дамбы поселкесінің 32 жастағы тұрғынына тиесілі болды. Қылмыстық іс қозғалды.
***
Сәуірдің 18-іне қараған түні белгісіз біреу Бигелдинов көшесінің бойындағы үйлердің бірінің жанында тұрған ВАЗ-2114 көлігінің алдыңғы әйнегін сындырып кеткен. Бұзақылық жасады деген күдікпен Тасқала-3 поселкесінің тұрғыны ұсталды.
***
Сәуірдің 18-іне қараған түні Атырау-Индер тас жолының 63-ші шақырымында Махамбет АІІБ қызметкерлері Орал қаласының 30 жастағы тұрғыны жүргізіп келе жатқан «Тойота» пикапын ұстаған. Оның шанағынан бір тоннадан астам қара балық табылды.
***
Мақат АІІБ қызметкерлері өткен жылдың қыркүйегінде Доссордағы үйлердің бірінің сарайынан құрал-саймандар мен 7 келі жылқы етін ұрлады деп күдіктелген үш доссорлықты ұстады.
***
Сол күні Атырау-Астрахан тас жолында «Новобогат» бақылау-өткізу қосынында су полициясының қызметкерлері Құлсары қаласының 29 жастағы тұрғыны жүргізіп келе жатқан «Рено» көлігін ұстады. Салоннан 6 центнер сазан табылды. Тексеру жүргізілуде.
***
«Бекіре-2015» операциясының барысында желілік полиция бөлімінің қызметкерлері Атырау әуежайында 27 жастағы жолаушыдан 1 келі қара уылдырық тапты.